Boshqa maktab o‘qituvchisi darslarni taqsimlashi mumkinmi?
@Yurist_Xizmati 5252-savol:
Assalomu alaykum! Men maktabda ona tili va adabiyot metodbirlashma rahbari,ona tili va adabiyot o‘qituvchisi bo‘lib ishlayman. Yaqinda Ilmiy bo‘lim mudiri ishlamasligi sababli qo‘shni tumanda ishlaydigan xodim maktabga kelib pedkengashni o‘tkazib o‘qituvchilarga dag‘dag‘a qilib mening darsimni 4 soatga qisqartirib tashlagan. Men 1- toifali o‘qituvchiman. Qizig‘i shundaki, xodimning ishga kirishi haqida hech qanday buyrug‘i yo‘q ekan. So‘rab surishtirganimizda 2-sentabr kuni buyrug‘i chiqishini aytdi. Bu holat qanchalik qonunga to‘g‘ri keladi.Hali buyrug‘i yo‘q, maktabga aloqasi bo‘lmagan shaxs pedkengashni o‘tkazishi mumkinmi. Agar mumkin bo‘lmasa bu holatga qonunda qanday jazo bor. Mening 3 nafar farzandim va 4 nafar vasiyligimga olgan bolalarim bor.Hozirda shularning 3 nafarini to‘lov kontrakt asosida o‘qityapman. Buyrug‘i chiqmagan yangi zavuch mening ne ilmiy salohiyatimni,ne oilaviy sharoitimni inobatga oldi.Iltimos menga amaliy yordam bering
YURIST JAVOBI:
Mehnat munosabatlari xodim bilan ish beruvchi o‘rtasida mehnat shartnomasi imzolangan va YAMMT (yagona milliy mehnat tizimiga) kiritilgandan so‘ng vujudga keladi. Bu Mehnat kodeksining 126 va 127-moddalarida belgilangan qoida sanaladi.
⏳Endi dars taqsimotiga kelsak, darslar “Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risida”gi nizom (ro‘yxat raqami 3271) 15-bandiga ko‘ra umumta’lim muassasalari tomonidan shakllantirilgan dars soatlari setkasi umumta’lim muassasasining pedagogik kengashi tomonidan tasdiqlanadi.
♂️ Bunda Umumiy o‘rta ta’lim muassasasining pedagogik kengashi to‘g‘risidagi namunaviy nizom (09.06.2016 yilda ro‘yxatdan o‘tgan, ro‘yxat raqami 2799) 6-bandida pedagogik kengash tarkibi umumta’lim muassasasi direktori, direktor o‘rinbosarlari va pedagog xodimlardan iborat bo‘lishi nazarda tutilgan.
Shuningdek, umumta’lim muassasasining har bir pedagog xodimi ishga qabul qilingan paytdan boshlab pedagogik kengashning a’zosi hisoblanadi.
❌ Demak, sizlardagi holatda hali ishga qabul qilinmagan shaxs dars taqsimotiga aralashishga haqli emas.
❗️Bu holatda siz tuman adliya bo‘limiga yoki mehnat inspektoriga murojaat qilishingiz mumkin.
✉️ Yuristga savol yuborish
Yurist bilan qo‘ng‘iroq orqali bog‘lanish
Barcha turdagi hujjatlarga buyurtma berish
Rasmiy kanalimiz:
@Yurist_Xizmati