Dekretdan dekretga ulanganda necha foiz dekret puli to‘lanadi?
@Yurist_Xizmati 5045-savol:
Assalomu alaykum. Men 2016-yil sentabrdan ingliz tili o‘qituvchisi bolib ishlayman. 3- farzandimga dekret tatilidaligim davomida yana 4- farzandimga xomilador boldim. Savolim shuki dekretdan dekretga ulaganda necha foiz dekret tolanadi va meni til boyicha 50 foizlik ustamam dekabrda muddati tugadi shuning uchun dekret pulimdan bu ustami chiqarib yuborishlari mumkinmi?
YURIST JAVOBI:
Mehnat kodeksining 404-moddasiga binoan ayolga tug‘ruqqacha 70 kalendar kun hamda tug‘ruqdan keyin 56 kalendar kun (tug‘ish qiyin kechgan yoxud ikki yoki undan ortiq bola tug‘ilgan taqdirda 70 kalendar kun) homiladorlik va tug‘ish ta’tili berilib, qonunchilikda belgilangan, lekin o‘rtacha oylik ish haqining 75 foizidan kam bo‘lmagan miqdorda nafaqa to‘lanadi.
Qarang! Mehnatga layoqatsizlik varaqalarini berish tartibi to‘g‘risidagi yo‘riqnomaning (ro‘yxat raqami 2667, 17.04.2015-y.) 28-bandiga ko‘ra homiladorlikning o‘ttizinchi haftasidan keyin murojaat qilinganda tug‘ishga qadar necha kun qolganidan qat’i nazar, mehnatga layoqatsizlik varaqasi murojaat qilgan kundan to‘liq 126 kalendar kuniga beriladi.
Shuningdek, nizom 27-bandiga ko‘ra tug‘ish qiyin kechgan yoki ikki va undan ortiq bola tug‘ilgan hollarda homiladorlik va tug‘ish ta’tilini uzaytirish uchun tug‘ruq muassasasi tomonidan yana 14 kalendar kuniga mehnatga layoqatsizlik varaqasi beriladi.
☝️E’tibor bergan bo‘lsangiz, dekret kalendar kunlari bo‘yicha beriladi. Bu degani, bayram yoki dam olish kunlari ham shu 126 yoki 140 kun ichiga qo‘shilib ketadi. Boshqacha aytganda bu kunlar chiqarib tashlanmaydi.
Bunda Vazirlar Mahkamasining 2024-yil 31-maydagi 314-son qaroriga 1-ilovada tasdiqlangan Nizom 35-bandi mazmuniga binoan, homiladorlik va tug‘ish bo‘yicha hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan nafaqalar xodim:
ishga qabul qilingan kundan 12 oygacha ish stajiga ega bo‘lganda — o‘rtacha oylik ish haqining 75 foizi;
ishga qabul qilingan kundan 12 oydan ortiq ish stajiga ega bo‘lganda — o‘rtacha oylik ish haqining 100 foizi miqdorida to‘lanadi.
Ushbu nizom 36-bandiga ko‘ra nafaqalar barcha hollarda xodimning haqiqiy ish haqidan hisoblab chiqariladi. Shunga ko‘ra dekret puli ham yuqoridagi asosga muvofiq hisoblab chiqariladi.
❗️E’tibor bergan bo‘lsangiz, derket puli o‘rtacha oylik ish haqidan kelib chiqib to‘lanishi belgilangan. Bunda Mehnat kodeksining 257-moddasiga asosan xodimning o‘rtacha oylik ish haqi hisoblanadi.
Ushbu moddaning uchinchi qismiga ko‘ra Mehnatga haq to‘lashning vaqtbay tizimidagi xodimlarning o‘rtacha ish haqi xodimning o‘rtacha ish haqi saqlanib qoladigan oydan oldingi oxirgi kalendar oy uchun tarif stavkasi (lavozim maoshi) miqdoridan kelib chiqib, xodimning o‘rtacha ish haqi saqlanib qoladigan oydan oldingi 12 kalendar oy uchun ustamalar, mukofotlar va boshqa to‘lovlar (ushbu Kodeks 248-moddasining uchinchi qismida nazarda tutilgan ish haqining qo‘shimcha qismi) summasining o‘n ikkidan bir qismi o‘rtacha ish haqiga jamlangan holda belgilanadi.
➕ Mana shu qoidaga ko‘ra xodimning ustamalari uning o‘rtacha ish haqini hisoblashda qo‘shiladi. Demak, sizga ham homiladorlik va tug‘ish nafaqasi yuqoridagi qoidaga muvofiq o‘rtacha oylik ish haqingizdan kelib chiqib to‘lanadi.
✅ Xulosa qiladigan bo‘lsak, dekret puli sizning derketga chiqishingizdan oldingi 12 oylik davrdagi ish haqingiz hisobga olinadi.
telegram kanal -yurist xizmati