Dekret puli dekretdan dekretga ulansa necha foiz to‘lab beriladi?
Dekret puli bu ayollar homiladorlik va tug‘ruq ta’tili vaqtida oladigan nafaqa puli bo‘lib, u mehnatga layoqatsizlik davrida ayolning moddiy ta’minotini kafolatlash uchun belgilanadi.
Qonunchiligimizda dekret puli berish tartibi belgilangan bo‘lib, Mehnat kodeksining 404-moddasiga ko‘ra, ayolga tug‘ruqqacha 70 kalendar kun hamda tug‘ruqdan keyin 56 kalendar kun (tug‘ish qiyin kechgan yoxud ikki yoki undan ortiq bola tug‘ilgan taqdirda 70 kalendar kun) homiladorlik va tug‘ish ta’tili berilib, qonunchilikda belgilangan, lekin o‘rtacha oylik ish haqining 75 foizidan kam bo‘lmagan miqdorda nafaqa to‘lanadi.
Kundalik hayotda xodim ketma-ket ravishda dekretga chiqishi mumkin. Bunday holatlarda dekret puli to‘lanadimi agar to‘lansa umumiy yuz foiz to‘lanadimi degan savollar ko‘p uchramoqda.
Vazirlar Mahkamasining 2024 yil 31 maydagi 314-son qaroriga 1-ilova “Vaqtinchalik mehnatga layoqatsizlik, homiladorlik va tug‘ish bo‘yicha nafaqalarni hamda yangi tug‘ilgan bolani farzandlikka olgan yoki unga vasiy qilib belgilangan xodimga nafaqani tayinlash hamda to‘lash tartibi to‘g‘risida”gi nizomning 35-bandiga ko‘ra, homiladorlik va tug‘ish bo‘yicha hamda yangi tug‘ilgan bolani farzandlikka olgan yoki unga vasiy qilib belgilangan xodimga beriladigan nafaqalar xodim:
— ishga qabul qilingan kundan 12 oygacha ish stajiga ega bo‘lganda — o‘rtacha oylik ish haqining 75 foizi;
— ishga qabul qilingan kundan 12 oy ortiq ish stajiga ega bo‘lganda — o‘rtacha oylik ish haqining 100 foizi miqdorida to‘lanadi.
Etibor bering, umumiy ish staj haqida emas, aynan ishga qabul qilingan kundan keyingi staj haqida gap ketmoqda. Ya’ni aytaylik, 10 yillik ish stajiga ega ayol, boshqa yangi ishga qabul qilindi va oradan 6 oy o‘tgach dekretga chiqdi, dekret puli 75 foiz to‘lanadi.
Demak, agar xodim ishga qabul qilingan kundan boshlab 12 oygacha ish stajiga ega bo‘lsa, dekret puli 75 foiz to‘lanadi.
Aytaylik, ayol 2025 yil yanvar oyida ishga kirdi. 6 oydan so‘ng dekretga chiqib ketdi, bu holatda ayolga dekret puli 75 foiz to‘lanadi. Endi huddi shu ayol, dekretdan so‘ng bola parvarish ta’tiliga chiqib, 2-farzandiga dekretga chiqdi. Bu holatda esa 100 foiz to‘lanadi, sababi ayolni ishga qabul qilinganiga 12 oydan oshdi.
Yuqoridagilarga asosan xodim birinchi farzandiga dekretga chiqishdan avval 12 oy to‘liq ishlagan bo‘lsa 100 foiz to‘lanadi. 12 oydan kam ishlagan bo‘lsa 75 foiz to‘lanadi.
Murojaat uchun:
@advokat24uzbot
Bizning kanal:
@advokat24uz