Bir oylik armiyaga borgandim, shunga ta’tilning yarmini berishlari to‘g‘rimi?
@Yurist_Xizmati 4613-savol:
Assalomu alaykum yaxshimisiz Men Maktabda ishlayman shuyil 2024-1-aprelda muddatli harbiy xizmatni 1 oylik utab keldim ish joyimdan xozirda menga mexnat ta'tili 28 kun berilopti aslida 56 bulishi kerak. Men bir oy harbiy xizmatni utaganimni mexnat ta'tilini yarimidan hisoblanadimi xozirda menga mexnat ta'tilini 28 kuniga pul tashlagan shu tuğrimi?
YURIST JAVOBI:
Mehnat kodeksining 227-moddasiga asosan birinchi ish yili uchun har yilgi mehnat ta’tilidan foydalanish huquqi xodimda u ushbu ish beruvchida uzluksiz ishlagan olti oy o‘tganidan keyin yuzaga keladi.
Bunda birinchi ish yili aynan shu ish beruvchi mehnat shartnomasi tuzilgan vaqtdan boshlab hisoblanadi.
Mehnat kodeksining 233-moddasida har yilgi mehnat ta’tilida bo‘lgan vaqti uchun xodimga ushbu Kodeksning 257-moddasiga muvofiq hisoblab chiqariladigan o‘rtacha ish haqining saqlanishi kafolatlanishi belgilangan.
Bunda o‘rtacha ish haqi u hisoblanadigan oydan oldingi o‘n ikki oyni tashkil etuvchi hisob-kitob davri yoxud agar xodim o‘n ikki oydan kam ishlagan bo‘lsa, amalda ishlangan davr uchun xodimga hisoblangan ish haqidan kelib chiqqan holda belgilanadi (MK 257-m 1-qism).
Shu qoidaga ko‘ra xodimning o‘rtacha oylik ish haqini hisoblashda u 12 oydan ortiq ishlagan bo‘lsa, uning ta’tilga chiqishdan oldingi 12 oylik davrda korxonadan olgan barcha to‘lovlari (ish haqi, moddiy yordam, mukofot puli va boshqalar) qo‘shilgan holda 12ga bo‘linadi.
Bunda Mehnat kodeksining 218-moddasi hamda Vazirlar Mahkamasining 2023 yil 26 iyundagi 263-son qaroriga binoan o‘qituvchilarga 56 kalendar kunidan iborat ta’til beriladi va ta’tilning 48 kuniga ta’til puli to‘lanadi.
Endi qarang! MK 226-moddasiga ko‘ra har yilgi asosiy mehnat ta’tilini va bitta tashkilotda yoki tarmoqda ko‘p yillik ish staji uchun qo‘shimcha ta’til olish huquqini beruvchi ish staji jumlasiga xodim haqiqatda ishlamagan, lekin mehnat to‘g‘risidagi qonunchilikka va mehnat haqidagi boshqa huquqiy hujjatlarga, mehnat shartnomasiga muvofiq uning ish o‘rni (lavozimi) saqlangan vaqt, shu jumladan har yilgi mehnat ta’tili vaqti, dam olish kunlari, ishlanmaydigan bayram kunlari hamda qonunchilikda belgilangan boshqa davrlari kiradi.
❗️Ushbu kodeks 282-moddasiga ko‘ra xodim harbiy majburiyatlarni bajarayotganda ish beruvchi uni ishdan ish joyini (lavozimini) va o‘rtacha oylik ish haqini saqlagan holda ozod etishi shart.
✅ Xulosa qiladigan bo‘lsak, sizning 1 oylik harbiy xizmatni o‘tash davringiz mehnat ta’tili uchun ish stajiga qo‘shiladi. Shunga asosan sizga mehnat ta’tili va ta’til puli to‘liq berilishi shart.