Yangi erim qizimni farzandlikka olmoqchi, bunda qizimning otasini roziligi kerakmi?
@Yurist_Xizmati 4406-savol:
Assalomu alaykum yaxshimisiz men ajrashganman bir qizim bor 5 yilcha bo‘ldi endi turmush qurish arafasidaman qizimni bo‘lajak erim o‘z nomiga o‘tirmoqchi shunga qanday hujjatlar kerak va nima qilish kerak. Sobiq erim mendan keyin 2 marta uylanib ikkita farzandi bor aliment berganman 30 million qarzi bor alimentdan. U endi meni turmushga chiqmoqchiligimni eshitib 8 yashar qizimni 5 yildan beri ko‘rmagan lekin endi qizimni bo‘lajak erimni nomiga o‘tirishga to‘sqinlik qilishi mumkinmi? Iltimos yordam beringlar. Men alimentdan vos kechsam u qizidan vos kechaman deb aytgan men alimentda vos kechganimdan keyin u gapida turmay qizidan vos kechmasachi bo‘lajak turmush o‘rtog‘imni nomiga o‘tkazolmasligimiz mumkinmi?
YURIST JAVOBI
Farzand buyum emaski, uni bir shaxs nomidan ikkinchi shaxs nomiga o‘tkazish mumkin bo‘lsa. Siz aytayotgan holat farzandlikka olish bilan bog‘liq hisoblanadi.
♂️ Ya’ni siz yangi turmushga chiqayotgan shaxs qizingizni farzandlikka olishi mumkin, shunday holatdagi qizingizning tug‘ilgan haqidagi guvohnomasiga o‘zgartirish kiritilib, ota ustinidagi yozuv o‘zgartiriladi.
❗️Biroq buning ham bir qator talablari mavjud. Oila kodeksining 151-moddasiga binoan farzandlikka olish bolani farzandlikka olishni istagan shaxslarning (shaxsning) arizasiga ko‘ra, vasiylik va homiylik organlarining farzandlikka olishning asosliligi va farzandlikka olinayotgan bola manfaatlariga to‘g‘ri kelishi haqidagi xulosasi hisobga olingan holda sud tomonidan amalga oshiriladi.
Ushbu kodeks 159-moddasiga asosan bolani farzandlikka olish uchun farzandlikka olinayotgan bola ota-onasining roziligi talab etiladi. Bunda ota-onaning bolaning farzandlikka olinishiga roziligi notarial tasdiqlangan bo‘lishi kerak yoki farzandlikka olish to‘g‘risida ish yuritilayotganda bevosita sudda bayon etilishi mumkin.
☝️Shunga ko‘ra sizdagi holatda ham qizingining otasi uni farzandlikka olish haqida rozilikni yuqoridagi tartibda berishi talab etiladi.
✅ Biroq ota-ona ota-onalik huquqidan mahrum qilingan bo‘lsa, unda uning roziligisiz farzandlikka olishga yo‘l qo‘yiladi.
❗️Sizdagi holatda ham OK 79-moddasiga asosan aliment qarzdorligini to‘lamayotganligi qizingizning otasini otalik huquqidan mahrum qilish uchun asos bo‘ladi. Bunday holatda siz OK 80-moddasida belgilangan tartibda sudga otalik huquqidan mahrum qilishni so‘rab ariza berishingiz lozim. Sud arizangizni qanoatlantirgandan so‘ng, yangi turmush o‘rtog‘ingiz qizingizni uning haqiqiy otasining roziligisiz farzandlikka olishi mumkin.