Bolaning familiyasini faqat ota tomondan boboning ismida bo‘lishi kerakmi yoki ona tomondan ham familiya bersa bo‘ladimi?
Murojaatchimiz juda qiziq savolni ko‘tarishgan. Sababi bugungi kunda ayni shu mazmunda savol beruvchilar soni ko‘paygani sababli bir postda batafsil javob berib o‘tamiz..
Bunda bolaga ona tomondagi boboning nomini ham familiya qilib berish mumkin.
Xususan, Oila kodeksining 69-moddasiga asosan bola ism, ota ismi va familiya olish huquqiga ega. Bolaga ism ota-onaning kelishuviga binoan, ota ismi — otasining ismiga ko‘ra beriladi. Bolaning familiyasi ota-onaning familiyasiga qarab belgilanadi.
Ota-ona turli familiyalarda bo‘lganda ota-onaning kelishuviga binoan bolaga otasining yoki onasining familiyasi beriladi. Ota-onaning xohishiga ko‘ra, bolaga ota yoki ona tomonidan milliy an’analarga ko‘ra boboning ismi bo‘yicha familiya berilishi mumkin. Ota-ona o‘rtasida bolaning ismi va (yoki) familiyasi bo‘yicha kelishuv bo‘lmaganda, kelib chiqqan nizo vasiylik va homiylik organi tomonidan hal etiladi.
Shuningdek, O‘zbekiston Respublikasi Vazirlar Mahkamasining 20.10.2023 yildagi 550-son qarori bilan tasdiqlangan Fuqarolik holati dalolatnomalarini qayd etish qoidalarining 23-bandiga ko‘ra, bolaning tug‘ilganligini qayd etishda unga familiya ota-onasining kelishuviga ko‘ra ota yoki onaning familiyasi, shuningdek milliy an’analarga muvofiq ota yoki ona tomonidan boboning ismi bo‘yicha beriladi. Kelishuv bo‘lmagan taqdirda nizolar vasiylik va homiylik organi, konsullik okrugida esa — konsul tomonidan hal etiladi.
Ya’ni, familiya u yoki bu tomondagi boboning ismi bo‘yicha beriladi. Qanday familiya berilishini ota-onaning o‘zi hal qiladi.
telegram kanal - yurist maslahati