2019 yilda to‘langan kontrakt puldan 12%ni qaytarib olish mumkinmi?
Soliq kodeksining 378-moddasiga asosan O‘zbekiston Respublikasining professional va oliy ta’lim tashkilotlarida ta’lim olish (o‘zining, farzandlarining, shuningdek yigirma olti yoshga to‘lmagan erining (xotinining) ta’lim olishi) uchun to‘lov jismoniy shaxslardan undiriladigan daromad solig‘idan ozod qilinadi.
Bunda mazkur imtiyoz soliq to‘lovchining professional va oliy ta’lim tashkilotlarida o‘qish uchun yo‘naltirilgan daromadlarga nisbatan ham qo‘llaniladi.
O‘zbekiston Respublikasining professional va oliy ta’lim tashkilotlarida ta’lim olish uchun yo‘naltiriladigan mablag‘larga jismoniy shaxslardan olinadigan daromad solig‘i bo‘yicha imtiyozni qo‘llash tartibi to‘g‘risidagi nizom (Ro‘yxat raqami 2107) 16-bandiga asosan:
O‘zbekiston Respublikasining professional va oliy ta’lim tashkilotlarida o‘qish uchun to‘lov jismoniy shaxs tomonidan mustaqil ravishda (naqd pul hisobiga, jismoniy shaxslarning hisob raqamlaridan yoki plastik kartalardan foydalangan holda) amalga oshirilganda, soliq chegirmasi O‘zbekiston Respublikasi Soliq kodeksining 396 — 398-moddalarida nazarda tutilgan tartibda davlat soliq xizmati organlariga jismoniy shaxsning jami yillik daromadi to‘g‘risidagi deklaratsiyani topshirish yo‘li orqali berilishi mumkin.
☝️Yuqoridagi qoidalarga muvofiq siz to‘lov kontrakti uchun to‘lagan pulingizni qaytarib olishingiz mumkin. Faqat ushbu kontrakt uchun to‘langan pullar rasmiy manbaga asoslansa (ya’ni ushbu daromaddan soliq undirilgan bo‘lishi kerak), kontrakt summasidan soliqni qaytarib olishingiz mumkin. Shunga ko‘ra siz kontrakt to‘lovlarini rasmiy manbadan olingan daromaddan to‘lagan bo‘lsangiz, undan soliqni qaytarib olishingiz mumkin.
❗️Biroq, Soliq kodeksining 88-moddasiga ko‘ra soliq majburiyati bo‘yicha da’vo qilish muddati, natijalariga ko‘ra soliq majburiyati aniqlanadigan soliq davri tugaganidan keyin uch yilni tashkil etadi.
Shunga ko‘ra siz hozirda da’vo qiladigan bo‘lsangiz, sizning da’voyingiz muddat o‘tgani tufayli rad qilinadi.
❌Xulosa qiladigan bo‘lsak, siz 2019 yildagi to‘lagan kontraktingiz pulini qaytarib ololmaysiz.