Uyim Renovatsiyaga tushgan nima qilsam bo‘ladi?
@Yurist_Xizmati 5674-savol:
Assalomu alaykum. Mening yashab turgan uyim 2 kavatlik uyning 1 chi kavatida joylashgan bulib 1 chi kavatida 2 ta xonadon ya’ni 1 xonali va 2 xonalik xonadon egasiman. Xozirgi kunga kelib uyimiz renovatsiyaga tushgan. Birinchi savolim: 1 xonalik uyimning kadastr xujjatida umumiy maydon 35, 6 kv.m. foydalanish maydoni esa 26 kv.m. deb kursatilgan. Kurilish tashkilotining vakillari menga umumiyni emas balki foydalanish kv.m. ni xisobga olamiz deyishyapti. Shu tugrimi? Menga urinma urin uy berishda xonadonimning umumiy kv.m. xisobga olinmaydimi?
Ikkinchi savolim: mening ikkala xonadonim 1 chi kavatda joylashganligi va orka tarafdan eshik ochilib ilgari kompyuter xizmati bulib foydanilgan. Ammo xujjatda noturar emas. Men kurilish tashkilotidan bitta xonadonim urniga 1 chi kavatidan magazin berilishini surashim mumkinmi?
Oldindan raxmat.
YURIST JAVOBI:
Siz ko‘targan masalalar yangi qabul qilingan “Shaharsozlik renovatsiyasi to‘g‘risida”gi O‘RQ-1149-son Qonun bilan tartibga solinadi. Biroq, avvalo muhim jihatni ta’kidlash kerak: ushbu Qonun rasmiy e’lon qilingan kundan e’tiboran 6 oy o‘tgach kuchga kiradi.
Shuning uchun, agar Sizning uyingiz bo‘yicha renovatsiya jarayonlari hozir amalga oshirilayotgan bo‘lsa, mazkur Qonun normalari hali to‘liq qo‘llanilmaydi.
❓1-savol. O‘rinma-o‘rin uy berishda umumiy maydonmi yoki foydalanish maydonimi hisobga olinadi?
➖ Yangi Qonunda kompensatsiya faqat foydalanish maydoni bo‘yicha hisoblanadi, degan norma mavjud emas.
Aksincha, Qonunning 40-moddasiga ko‘ra huquq egasiga:
turar yoki noturar joyning bozor qiymati;
yer uchastkasiga bo‘lgan huquqning bozor qiymati;
ko‘chish va vaqtincha ijara xarajatlari;
zarur hollarda boy berilgan foyda va boshqa xarajatlar qoplanishi belgilangan.
Shuningdek, Qonunning 13-moddasida renovatsiya natijasida mulkning holati avvalgisidan yomonlashmasligi, balki yaxshilanishi shartligi mustahkamlangan.
Shu sababli, qurilish tashkilotining "faqat 26 kv.m foydalanish maydoni hisobga olinadi" degan fikri yangi Qonundan kelib chiqmaydi. Agar Sizga o‘rinma-o‘rin uy berilsa, bu masala tuziladigan kelishuv bitimi va kompensatsiya shartlariga muvofiq hal qilinadi.
❓2-savol. Birinchi qavatdan do‘kon (noturar joy) talab qilish mumkinmi?
➖ Ha, talab qilishingiz mumkin, biroq qurilish tashkiloti buni majburiy ravishda berishi shart degan qoida yo‘q.
Qonunga ko‘ra renovatsiya jarayonida davlat, investor va mulkdor o‘rtasida kelishuv bitimi tuziladi. Mazkur bitimda kompensatsiya pul shaklida, boshqa turar joy, noturar joy yoki boshqa shartlar asosida belgilanishi mumkin.
Agar Sizning xonadoningiz amalda tadbirkorlik faoliyati uchun foydalanilgan bo‘lsa-yu, kadastr hujjatlarida u hanuz turar joy sifatida rasmiylashtirilgan bo‘lsa, qurilish tashkiloti Sizga do‘kon berishga majbur emas.
Biroq, muzokara jarayonida 1-qavatdan noturar joy (do‘kon) ajratishni taklif sifatida ilgari surishingiz mumkin. Bu masala faqat tomonlarning o‘zaro kelishuvi bilan hal etiladi.
Xulosa qilib aytganda:
➖faqat foydalanish maydoni hisobga olinadi, degan umumiy qoida yangi Qonunda mavjud emas;
➖Sizga beriladigan kompensatsiya yoki o‘rinma-o‘rin uy kelishuv bitimi asosida belgilanadi va mulkingizning holati yomonlashmasligi kerak;
➖1-qavatdan do‘kon so‘rashingiz mumkin, ammo bu Sizning avtomatik huquqingiz emas, balki kelishuv orqali hal qilinadigan masaladir.
✉️ Yuristga savol yuborish
Yurist bilan qo‘ng‘iroq orqali bog‘lanish
Rasmiy kanalimiz:
@Yurist_Xizmati