Qo‘shnim atayin tualet va qo‘yxonasini meni uyim tomonga qurdi, hidiga chidab bo‘lmayapti. Qanday chora ko‘rsam bo‘ladi?
@Yurist_Xizmati 4580-savol:
Assalomu alaykum. Qo‘shnim atayin tualet va qo‘yxonasini meni uyim tomonga qurib oldi. Hidiga chidab bo‘lmayapti. Qayerga murojaat qilishim kerak boshqa joyga ko‘chirishi uchun?
YURIST JAVOBI:
Sizdagi munoabatni to‘liq tartibga soluvchi normativ-huquqiy hujjatlar yo‘q.
Fuqarolik kodeksining 172-moddasi birinchi qismida mulkdorning o‘z huquqlarini amalga oshirishi boshqa shaxslarning huquqlarini va qonun bilan qo‘riqlanadigan manfaatlarini buzmasligi shartligi belgilangan.
Qoidaning mazmuniga ko‘ra qo‘shningizning huquqlari chegarasi sizning huquqlaringiz boshlangan joyda tugaydi. Shaharsozlik normalari va qoidalarining 26-bandiga ko‘ra qo‘shningiz uyida har qanday imorat qurayotganda qo‘shnilarning roziligini olish shart ekanligi belgilanadi. Agar bu imorat qo‘shnilar roziligisiz qurilgan bo‘lsa, Fuqarolik kodeksining 212-moddasiga asosan o‘zboshimchalik bilan qurilgan imorat sanaladi.
Aynan mana shu qoidaga ko‘ra qo‘shningiz o‘ziga tegishli bo‘lgan yer uchatkasida har qanday bino, inshoot qurishda yuqoridagi qoidalarni hisobga olishi zarur edi.
Shuni ham aytish kerakki, fuqarolik huquqiy munosabatlari ishtirokchilarining halol, oqilona va adolat bilan harakat qilishi nazarda tutiladi (FK 9-m).
☝️Mana shu qoidaga ko‘ra qo‘shningiz ushbu mezonlarga rioya qilishi kerak bo‘ladi.
♂️ Bundan tashqari mulkdor o‘zining ustunlik mavqeini suiiste’mol qilishga, boshqa shaxslarning huquqlarini va qonun bilan qo‘riqlanadigan manfaatlarini kamsitadigan o‘zga harakatlarni qilishga haqli emas.
❗️Xulosa qiladigan bo‘lsak, siz fuqarolik sudiga murojaat qilish orqali buzilgan huquqlaringiz tiklashingiz ya’ni qo‘shningizning uy-joyini Fuqarolik kodeksining 212-moddasiga asosan o‘zboshimchalik bilan qurilgan imorat deb topish va uni qo‘shningiz hisobidan buzdirib tashlashni so‘rashingiz mumkin.