QIZ NOMUSGA CHIDAY OLMAYAPTI. BOLAGA QANDAY CHORA KO‘RILADI?
Qizim maktabda o‘qiydi. Bilasiz hozir maktablarda kundalik.kom joriy qilingan. Hammada ozining paroli va shaxsiy kabineti bor. Parollar sinf rahbar orqali butun sinfga tarqatilgan edi yil boshida. Ammo bir o‘g‘il bola qizimning parolini ham yozib olgan ekan oshanda va uning shaxsiy kabinetiga kirib uning nomidan behayo gaplar yozgan. Buni sinfdoshlari quzimga xabar bergan, uning nomidan turli so‘zlar kelayotganini. U bola tan ham oldi qilganini. 9-sinf. Bu qilgan harakatiga qanday chora ko‘riladi? Qizim nomusga chiday olmayapti. Bola endi 15 yoshga to‘ladi.
JAVOB:
Ma’muriy javobgarlik to‘g‘risidagi kodeksning 46 prim 1-moddasiga ko‘ra shaxsning shaxsiy yoki oilaviy sirini tashkil etuvchi shaxsiy hayoti to‘g‘risidagi ma’lumotlarni uning roziligisiz qonunga xilof ravishda yig‘ish yoki tarqatish, —
bazaviy hisoblash miqdorining o‘n baravaridan qirq baravarigacha miqdorda jarima solishga sabab bo‘ladi.
Mazkur kodeksning 46 prim 2-moddasiga ko‘ra shaxsga doir ma’lumotlar to‘g‘risidagi qonunchilikni buzganlik fuqarolarga bazaviy hisoblash miqdorining yetti baravari, mansabdor shaxslarga esa — ellik baravari miqdorida jarima solishga sabab bo‘ladi.
Endi qarang. Siz savolingizda o‘quvchi bola 15 yoshda ekanligini bayon qilgansiz.
Ma’muriy javobgarlik to‘g‘risidagi kodeksning 13-moddasiga binoan ma’muriy huquqbuzarlik sodir etgan paytda o‘n olti yoshga to‘lgan shaxslargina ma’muriy javobgarlikka tortiladi.
Endi javobgarlik belgilanmaydimi degan savol sizda bo‘lishi tabiiy. Yo‘q, javobgarlik bor faqat uning ota-onasiga. Qanday javobgarlik deysizmi. Unda qarang.
Ma’muriy javobgarlik to‘g‘risidagi kodeksning 47-moddasiga ko‘ra ota-onalar yoki ularning o‘rnini bosuvchi shaxslar tomonidan voyaga yetmagan bolalarni tarbiyalash va ularga ta’lim berish borasidagi majburiyatlarni bajarmaslik, shu jumladan voyaga yetmagan bolalarning ma’muriy huquqbuzarlik sodir etishiga olib kelishi — bazaviy hisoblash miqdorining bir baravaridan besh baravarigacha miqdorda jarima solishga sabab bo‘ladi.
Demak, uning ota-onasi yoki ularning o‘rnini bosuvchi shaxslar ushbu modda asosida ma’muriy javobgarlikka tortiladi. Shu sababli yuqoridagi holat yuzasidan tuman IIBga murojaat qilishni maslahat beramiz.
Murojaat uchun:
@advokat24uzbot
Bizning kanal:
@advokat24uz