Mashina sigirni urib yuborsa, zararni kim qoplaydi?
@Yurist_Xizmati 5669-savol:
Sigirimni moshina urib ketdi avtomobil egasi molingni tolamayman avtomobilimni tamirlab berasan deyabdi shunga oydinlik kritsayiz
YURIST JAVOBI:
Agar avtomobil Sizning sigiringizni urib yuborgan bo‘lsa, masalaga har ikki tomonning aybi va hodisaning qanday sharoitda sodir bo‘lgani asosida huquqiy baho beriladi.
Fuqarolik kodeksining 999-moddasiga ko‘ra, transport vositasi oshirilgan xavf manbai hisoblanadi. Shu sababli transport vositasi egasi, agar zarar bartaraf etib bo‘lmaydigan kuch yoki jabrlanuvchining qasddan qilgan harakati oqibatida yuzaga kelganini isbotlay olmasa, yetkazilgan zararni qoplashga majbur.
Shuningdek, Fuqarolik kodeksining 985-moddasiga muvofiq, fuqaroning mol-mulkiga g‘ayriqonuniy harakat natijasida yetkazilgan zarar uni yetkazgan shaxs tomonidan to‘liq qoplanishi lozim. Biroq zarar yetkazgan shaxs o‘zining aybi yo‘qligini isbotlasa, javobgarlikdan ozod etilishi mumkin.
Shu sababli, avtomobil egasi "sigiringizni to‘lamayman, aksincha mashinamni ta’mirlab berasiz" deb talab qo‘yishi uchun avvalo yo‘l-transport hodisasi Sizning aybingiz bilan sodir bo‘lganini isbotlashi kerak. Masalan, sigir nazoratsiz ravishda yo‘lga chiqib ketganligi hodisaning asosiy sababi bo‘lganligi aniqlansa, masalaga boshqacha huquqiy baho berilishi mumkin. Agar bunday holat isbotlanmagan bo‘lsa, avtomobil egasi faqat o‘z xohishiga ko‘ra Sizdan avtomobilni ta’mirlash xarajatlarini talab qila olmaydi.
❗️Shuning uchun, hodisa yuzasidan YPX xodimlari tomonidan rasmiylashtirilgan hujjatlar, sxema, guvohlarning ko‘rsatmalari va boshqa dalillar asosida kimning aybi mavjudligi aniqlanadi. Aynan shundan keyin zarar kim tomonidan qoplanishi masalasi hal etiladi.
✉️ Yuristga savol yuborish
Yurist bilan qo‘ng‘iroq orqali bog‘lanish
Barcha turdagi hujjatlarga buyurtma berish
Rasmiy kanalimiz:
@Yurist_Xizmati