“YOSHLAR DAFTARI” ORQALI YOSHLARGA BЕRILADIGAN YORDAMLAR KЕNGAYTIRILDI — ENDI TA’LIM, UY-JOY, KASB, SPORT VA HATTO HAYDOVCHILIK XARAJATLARI HAM QOPLAB BЕRILADI
Vazirlar Mahkamasining 25 fevraldagi 78-son qarori bilan “Yoshlar daftari” jamg‘armasi orqali yoshlarga ko‘rsatiladigan ijtimoiy yordam tizimi sezilarli darajada kengaytirildi.
Qarorga ko‘ra, ijtimoiy reyestrga kiritilgan oilalarning 14 yoshdan 30 yoshgacha bo‘lgan farzandlari bir qator yo‘nalishlar bo‘yicha davlat tomonidan moliyaviy yordam olishi mumkin.
☑️ Avvalo, sport va san’at to‘garaklariga qatnashuvchi yoshlar qo‘llab-quvvatlanadi. Agar yoshlar sport mashg‘ulotlariga muntazam qatnashsa, ularning to‘garak xarajatlari “Yoshlar daftari” jamg‘armasi hisobidan qoplanadi. Qatnashish darajasiga qarab har oy BHMning 0,5 baravaridan 1 baravarigacha mablag‘ ajratiladi va bu jarayon elektron tizim orqali nazorat qilinadi. Shuningdek, kamida 6 oy davomida muntazam qatnashgan yoshlarga sport formasi, inventar yoki musiqa asboblari BHMning 10 baravarigacha miqdorda xarid qilib beriladi.
☑️ Qaror yoshlarni ish bilan ta’minlash masalasiga ham alohida e’tibor qaratgan. Endi mahallalarda ishsiz yoshlarni band qilish tashabbuslari uchun BHMning 60 baravarigacha grant mablag‘lari ajratiladi. Bu mablag‘lar yangi ish o‘rinlari yaratish va zarur asbob-uskunalar xaridiga yo‘naltiriladi.
☑️ Sog‘liqni saqlash yo‘nalishida ham muhim yengilliklar belgilandi. Ijtimoiy himoyaga muhtoj yoshlarning davolanish xarajatlari BHMning 50 baravarigacha, zarur hollarda esa jarrohlik amaliyotlari belgilangan tariflar doirasida qoplab beriladi. Bunday yordam yiliga bir marta ajratiladi.
☑️ Yangi tartibga muvofiq, yoshlar uchun haydovchilik guvohnomasi olish ham davlat tomonidan qo‘llab-quvvatlanadi. “A”, “B”, “D” va “DE” toifalari bo‘yicha o‘quv kurslari xarajatlari uchun BHMning 8 baravarigacha subsidiya beriladi. Mablag‘ning yarmi to‘g‘ridan to‘g‘ri o‘quv markaziga o‘tkaziladi, qolgan qismi esa haydovchilik guvohnomasi olingandan keyin to‘lanadi.
☑️ Ta’lim sohasida eng katta yangiliklardan biri — oliy va professional ta’lim kontrakt to‘lovlarining bir qismi qoplab berilishi hisoblanadi. Kunduzgi ta’limda o‘qiyotgan talabalar uchun kontrakt summasining 50 foizigacha, lekin BHMning 50 baravaridan oshmagan qismi davlat tomonidan to‘lab beriladi. Biroq bu yordamni olish uchun talaba yaxshi o‘qishi, ya’ni o‘rtacha bahosi kamida 4 bo‘lishi, volontyorlik faoliyatida qatnashishi, kitob mutolaasi bilan shug‘ullanishi va xorijiy tilni kamida B1 darajagacha o‘rganishi talab etiladi.
☑️ Qaror yosh oilalarni ham qamrab olgan. Endi ijtimoiy himoyaga muhtoj yosh oilalarga turar joy ijara xarajatlarining 50 foizigacha qismi 12 oygacha kompensatsiya qilib beriladi. Bunda to‘lov miqdori hududga qarab BHMning 2 baravarigacha, Toshkent shahri va viloyat markazlarida esa 3 baravarigacha belgilangan. Yaqin qarindoshlar o‘rtasidagi ijara shartnomalariga kompensatsiya berilmaydi.
☑️ Shu bilan birga, yoshlarni zamonaviy kasblarga o‘qitishga alohida urg‘u berilgan. Tadbirkorlik, IT, xorijiy tillar va boshqa zamonaviy kasblar bo‘yicha kurslarda o‘qish uchun 6 oygacha har oy BHMning 4 baravarigacha mablag‘ ajratiladi. Ilm-fan, sport va madaniyat sohalarida iqtidorli yoshlar uchun esa maxsus o‘quv kurslari xarajatlari har oy BHMning 1 baravarigacha qoplanadi.
☑️ Iqtidorli yoshlarni rag‘batlantirish maqsadida olimpiada va tanlovlarda qatnashish xarajatlari ham davlat tomonidan qoplanadi. Mahalliy bosqichlar uchun BHMning 4 baravarigacha, xalqaro bosqichlar uchun esa BHMning 40 baravarigacha yashash va transport xarajatlari uchun subsidiya ajratiladi.
☑️ Qarorga yana bir muhim yangilik sifatida, chekka hududlarda faoliyat yuritayotgan nodavlat ta’lim tashkilotlarini qo‘llab-quvvatlash mexanizmi kiritildi. Ularga binolar ijarasi yoki zarur jihozlar xaridi uchun BHMning 50 baravarigacha mablag‘ ajratilishi mumkin.
☑️ Bundan tashqari, yoshlarning intellektual salohiyatini oshirish, bo‘sh vaqtini mazmunli tashkil etish va “Besh muhim tashabbus” doirasidagi tadbirlarni moliyalashtirish uchun ham “Yoshlar daftari” jamg‘armasi mablag‘laridan foydalanish tartibi belgilandi. Har bir mahallada o‘tkaziladigan tadbirlar uchun bir oyda BHMning 20 baravarigacha mablag‘ ajratish mumkin.
Ijtimoiy axborot - ijtimoiy-huquqiy kanal