Qizil maktab maqomi qayta tiklansa, ustama yana to‘lanadimi?
@Yurist_Xizmati 5681-savol:
Assalomu alaykum. Savol yo‘llamoqchiman Men Navoiy viloyati Nurota tumanida yashayman, kasbim matematika o‘qituvchisi, toifam oliy. Savol davomi...
YURIST JAVOBI:
Siz bayon qilgan holat Vazirlar Mahkamasining 2021-yil 15-oktabrdagi 646-son qarori bilan to‘liq tartibga solinmagan. Chunki Nizomda maktabning "ta’lim darajasi yuqori bo‘lmagan maktab (qizil maktab) → ro‘yxatdan chiqishi → keyinchalik yana ro‘yxatga kiritilishi" holati yuzasidan alohida qoida mavjud emas.
Mazkur Nizomning 23-bandiga ko‘ra, boshqa ma’muriy-hududiy birlikdan kelib, ta’lim darajasi yuqori bo‘lmagan maktabda ishlayotgan pedagoglarga bazaviy tarif stavkasiga nisbatan 100 foiz miqdorida maxsus ustama to‘lanadi.
Shuningdek, Nizomning 24-bandida ta’lim darajasi yuqori bo‘lmagan maktablar ro‘yxatidan chiqarilgan maktablarda faoliyat yuritayotgan pedagoglarga mazkur ustama keyingi bir o‘quv yili davomida ham saqlab qolinishi belgilangan.
Sizning holatingizda:
2024-yilda qizil maktabga ishga kirgansiz va 100 foiz ustama olgansiz;
keyingi o‘quv yilida maktab qizil ro‘yxatdan chiqqan bo‘lsa-da, 24-bandga asosan yana bir yil ustama to‘langan;
yangi o‘quv yilidan esa maktab yana ta’lim darajasi yuqori bo‘lmagan maktablar ro‘yxatiga kiritilgan.
Biroq, 646-son qarorda aynan shunday holatda ustama to‘lanmasligi yoki aksincha qayta tayinlanishi haqida hech qanday norma mavjud emas.
Shu sababli mazkur masalada qonunchilikda huquqiy noaniqlik mavjud deb hisoblaymiz.
Bunday vaziyatda esa O‘zbekiston Respublikasi Konstitutsiyasining 20-moddasi qo‘llaniladi. Mazkur moddaga ko‘ra:
"Inson bilan davlat organlarining o‘zaro munosabatlarida yuzaga keladigan qonunchilikdagi barcha ziddiyatlar va noaniqliklar inson foydasiga talqin etiladi."
Demak, 646-son qarorda ushbu holat bo‘yicha taqiq belgilanmaganligi sababli, mavjud noaniqlik pedagog foydasiga talqin qilinishi lozim. Ya’ni maktab yana ta’lim darajasi yuqori bo‘lmagan maktablar ro‘yxatiga kiritilganligi 23-bandda nazarda tutilgan 100 foiz maxsus ustamani to‘lash uchun yangi huquqiy asos hisoblanadi.
⚪️Boshqa qizil maktabga o‘tish masalasiga kelsak
Agar Siz amaldagi shartnomani bekor qilib, boshqa ta’lim darajasi yuqori bo‘lmagan maktabga o‘tishni rejalashtirsangiz, bu masalada 646-son qaror bilan tasdiqlangan Nizomning 12-bandi talablariga e’tibor berish lozim.
Mazkur bandga ko‘ra, boshqa hududdagi ta’lim darajasi yuqori bo‘lmagan maktabga jalb qilinayotgan pedagogning amalda faoliyat yuritayotgan maktabi ta’lim darajasi yuqori bo‘lmagan maktablar ro‘yxatida mavjud bo‘lmasligi talab etiladi.
Shu sababli, agar Sizning hozirgi maktabingiz yana qizil maktablar ro‘yxatiga kiritilgan bo‘lsa, 646-son qaror asosida boshqa qizil maktabga o‘tish imkoniyati mavjud emas, chunki Nizomning 12-bandida belgilangan shartga javob bermaysiz.
Xulosa qilib aytganda, amaldagi qonunchilikka ko‘ra Siz ishlayotgan maktabning qayta qizil maktablar ro‘yxatiga kiritilishi 100 foiz ustamani davom ettirish uchun yangi huquqiy asos sifatida baholanishi mumkin. Chunki 646-son qarorda bunday vaziyatni taqiqlovchi norma mavjud emas. Aksincha, qonunchilikdagi ushbu noaniqlik Konstitutsiyaning 20-moddasi talabiga muvofiq fuqaro foydasiga talqin qilinishi lozim. Shu bilan birga, amaldagi maktab qizil ro‘yxatda bo‘lganligi sababli, Nizomning 12-bandi asosida boshqa qizil maktabga o‘tish imkoniyati mavjud emas.
✉️ Yuristga savol yuborish
Yurist bilan qo‘ng‘iroq orqali bog‘lanish
Rasmiy kanalimiz:
@Yurist_Xizmati