Xususiy universitet o‘qituvchi bilan muddatli shartnoma tuzishi mumkinmi?
@Yurist_Xizmati 5617-savol:
Assalomu alaykum, Mening savolim quyidagidan iborat. Men 2024-yil 4-sentyabrda NNT institutga 1 shtat birligida dotsent lavozimiga ishga kirganman. 2025-yil 3 iyun kuni menga men bilan institut o‘rtasida tuzilgan mehnat shartnomasi 2025-yil 30-iyundan bekor qilinishi haqida ogohlantirish xati berilgan. Men 2025-yilning avgust oyi oxirida ishdan bo‘shatilganimni bildim, lekin hozirgacha ishdan bo‘shash buyrug‘i bilan tanishtirib, buyruqdan nusxa bergan emas.
Savol. Men bilan institutning 10 oylik mehnat shartnomasi tuzishi qonunga muvofiqmi? Bizni ishdan bo‘shatishi qonuniymi?
Javob uchun oldindan rahmat
YURIST JAVOBI:
Mehnat kodeksining 158-moddasiga asosan muddatli mehnat shartnomasi muddati tugashi bilan bekor qilinishi mumkin. Biroq universitet professor-o‘qituvchilari bilan muddatli mehnat shartnomasini tuzish noqonuniy. Bu Mehnat kodeksining 111 – 113-moddalarida mustahkamlangan qoida hisoblanadi.
MK170-moddasiga asosan mehnat shartnomasini bekor qilish ishga qabul qilish huquqiga ega bo‘lgan shaxslar tomonidan amalga oshiriladi va ish beruvchining buyrug‘i bilan rasmiylashtiriladi.
Ushbu kodeks 171-moddasi qoidalari muvofiq ish beruvchi mehnat shartnomasi bekor qilingan kuni xodimga uning mehnat daftarchasini yoxud elektron mehnat daftarchasidan ko‘chirmani, shuningdek mehnat shartnomasini bekor qilish to‘g‘risidagi buyruqning ko‘chirma nusxasini berishi shart.
Demak, sizdagi holatda ish beruvchi buyruq nusxasini berishi kerak edi.
Endi qarang! Mehnat kodeksining 560-moddasida ishga tiklash to‘g‘risidagi nizolar bo‘yicha — xodimga u bilan mehnat shartnomasi bekor qilinganligi haqidagi ish beruvchi buyrug‘ining ko‘chirma nusxasi topshirilgan kundan e’tiboran uch oy ichida sudga murojaat qilishi lozimligi belgilangan.
E’tibor bergan bo‘lsangiz, qoidada 3 oylik muddat “buyruqning ko‘chirma nusxasi topshirilgan” kundan boshlab o‘tishi belgilangan.
Shunday ekan, sizdagi holatda buyruq nusxasi sizga topshirilmagan yoki pochta orqali yuborilmagan bo‘lsa, muddat o‘tmagan sanaladi. Bu holatda sizga tuman adliya bo‘limiga murojaat qilishingiz lozim. Ushbu organ ish beruvchidan buyruq nusxasini olishi va sizning manfaatingizda ishga tiklash haqida da’vo arizasi bilan sudga murojaat qilishi mumkin.
✉️ Yuristga savol yuborish
Yurist bilan qo‘ng‘iroq orqali bog‘lanish
Barcha turdagi hujjatlarga buyurtma berish
Rasmiy kanalimiz:
@Yurist_Xizmati