DIRЕKTOR O‘ZINI QIZINI MAKTABGA O‘QITUVCHI QILIB OLISHI MUMKINMI?
Assalomu aleykum. Maktab direktori farzandini o‘zi ishlayotgan maktabga ish bilan taminlashi mumkinmi farzandi xozirda talaba. Javobingiz uchun rahmat
JAVOB:
Mehnat kodeksining 121-moddasiga ko‘ra, o‘zaro yaqin qarindosh yoki quda tomondan qarindosh bo‘lgan shaxslarning (ota-ona, aka-ukalar, opa-singillar, o‘g‘illar, qizlar, er-xotin, shuningdek er-xotinning ota-onasi, aka-ukalari, opa-singillari va farzandlari) aynan bitta davlat tashkilotida birga xizmat qilishi, agar ularning birga xizmat qilishi ulardan birining ikkinchisiga bevosita bo‘ysunishiga yoki uning nazorati ostida bo‘lishiga bog‘liq bo‘lsa taqiqlanadi. Ushbu qoidadan istisnolar O‘zbekiston Respublikasi Vazirlar Mahkamasi tomonidan belgilanishi mumkin.
Vazirlar Mahkamasining 1997-yil 11-martdagi 133-son qaroriga 3-ilovasida davlat (aksionerlik) korxonalarining O‘zbekiston Respublikasi Mehnat kodeksining 121-moddasida nazarda tutilgan qarindosh-urug‘larning, agar ularning xizmatlari ulardan birining boshqasiga bevosita bo‘ysunishi yoki nazorati ostida bo‘lishi bilan bog‘liq bo‘lsa, birga xizmat qilishlarini cheklash qoidalaridan istisno etilishi mumkin bo‘lgan xodimlari ro‘yxati keltirilgan. Ro‘yxatning 6-bandida barcha o‘quv va tarbiya muassasalaridagi pedagog xodimlar, o‘qituvchilar, bibliograflar va kutubxonachilar belgilangan.
Demak, maktab direktorining yaqin qarindoshlari (ota-ona, aka-ukalar, opa-singillar, o‘g‘illar, qizlar, er-xotin, shuningdek er-xotinning ota-onasi, aka-ukalari, opa-singillari va farzandlari) shu maktabda pedagog xodim, o‘qituvchi, bibliograf va kutubxonachi sifatida ishlashi mumkin.
Farzandining talabaligiga to‘xtalsak, Vazirlar Mahkamasining 2005-yil 21-dekabrdagi 275-son qaroriga 3-ilova 8-bandiga ko‘ra, oliy ta’lim muassasasining kunduzgi, kechki, sirtqi ta’lim shakllarining pedagogika yo‘nalishlarida o‘qiyotgan shaxslar 3-kursdan boshlab o‘qishiga xalaqit bermagan holda pedagoglik ishini amalga oshirish uchun umumta’lim muassasalarida asosiy ish joyi sifatida ishga qabul qilinishi mumkin