Kunduzgi ta’lim shaklidan sirtqiga ko‘chirsa bo‘ladimi?
@Yurist_Xizmati 5043-savol:
Assalomu alaykum.Man imtiyoz bilan grantga kunduzgi o‘qishga kirdim, psixologiyaga. Shuni sirtqi shaklga o‘tkazsa bo‘ladimi.?
YURIST JAVOBI:
Vazirlar Mahkamasining 2017 yil 20 iyundagi 393-son qaroriga 3-ilovada tasdiqlangan “Oliy ta’lim muassasalari talabalari o‘qishini ko‘chirish, qayta tiklash va o‘qishdan chetlashtirish tartibi to‘g‘risida”gi Nizom 9-bandida fuqaroning o‘qishini ko‘chirish va qayta tiklash haqidagi arizasiga rad javobi berilishiga asos bo‘ladigan holatlar belgilangan.
♂️ Lekin ular qatorida sizdagi vaziyatga mos keladigan asos mavjud emas.
✅ Shunday ekan, siz kunduzgi ta’lim shaklidan sirtqi ta’lim shakliga o‘qishni ko‘chirishingiz mumkin.
©️Bunda Nizomning 22-bandiga asosan o‘qishning barcha shakllari bo‘yicha oliy ta’limning mos va turdosh yo‘nalishlari hamda mos mutaxassisliklari bo‘yicha davlat grantlari o‘rinlariga ko‘chirishga faqat davlat grantlari asosida tahsil olgan talabalar arizasiga ko‘ra oliy ta’lim muassasalarida tegishli o‘quv yilidagi qabul qilish kvotalarida belgilangan davlat grantlarining soni doirasida ruxsat etiladi.
⚠️ Biroq boshqa hollarda (misol uchun davlat granti kvotalari soni mavjud bo‘lmaganda) o‘qishni ko‘chirish to‘lov-kontrakt asosida amalga oshiriladi.
Bunda Nizom 15-bandiga ko‘ra o‘qishini ko‘chirish bo‘yicha arizalarni taqdim etish — har yili 15 iyuldan 5 avgustga qadar amalga oshiriladi.
O‘qishini ko‘chirish istagini bildirgan fuqaro quyidagi hujjatlarni taqdim etadi:
ko‘chirish (qayta tiklash)ni istagan ta’lim yo‘nalishi (mutaxassisligi), o‘quv tili va shakli ko‘rsatilgan holdagi ariza (arizada o‘qigan oliy ta’lim muassasasi va ta’lim yo‘nalishi (mutaxassisligi), ta’lim shakli, maqsadli qabul bo‘yicha o‘qishga kirmaganligi, ko‘chirish (qayta tiklash) sabablari, ko‘chirish (qayta tiklash) qoidalari bilan tanishganligi ko‘rsatiladi);
talabaning reyting daftarchasi yoki belgilangan shakldagi akademik ma’lumotnoma nusxalari;
pasportning nusxasi.