NIKOHNI HAQIQIY EMAS DЕB TOPSA BO‘LADIMI?
Oila kodeksining 49-moddasiga ko‘ra nikoh quyidagi hollarda haqiqiy emas deb topiladi:
➖ushbu Kodeksning 14—16-moddalarida belgilangan shartlar buzilganda;
➖soxta nikoh tuzilganda, ya’ni er-xotin yoki ulardan biri oila qurish maqsadini ko‘zlamay nikoh qayd qildirganda;
➖nikohlanuvchi shaxslardan biri tanosil kasalligi yoki odamning immunitet tanqisligi virusi (OIV kasalligi) borligini ikkinchisidan yashirganda, agar ikkinchisi sudga shunday talab bilan murojaat etsa.
Oila kodeksining 14-16-moddalari haqida batafsilroq to‘xtalamiz.
14-modda. Nikoh tuzishning ixtiyoriyligi
Nikoh tuzish ixtiyoriydir. Nikoh tuzish uchun bo‘lajak er-xotin o‘z roziligini erkin ifoda etish qobiliyatiga ega bo‘lishi kerak. Nikoh tuzishga majbur qilish taqiqlanadi.
15-modda. Nikoh yoshi
Nikoh yoshi erkaklar va ayollar uchun o‘n sakkiz yosh etib belgilanadi.
16-modda. Nikoh tuzishga:
➖loaqal bittasi ro‘yxatga olingan boshqa nikohda turgan shaxslar o‘rtasida;
➖nasl-nasab shajarasi bo‘yicha to‘g‘ri tutashgan qarindoshlar o‘rtasida, tug‘ishgan va o‘gay aka-ukalar bilan opa-singillar o‘rtasida, shuningdek, farzandlikka oluvchilar bilan farzandlikka olinganlar o‘rtasida;
➖loaqal bittasi ruhiyat buzilishi (ruhiy kasalligi yoki aqli zaifligi) sababli sud tomonidan muomalaga layoqatsiz deb topilgan shaxslar o‘rtasida yo‘l qo‘yilmaydi.