Maktab hududidagi yerni dehqonchilik qilish uchun ijaraga berish mumkin?
@Yurist_Xizmati 4785-savol:
Assalomu alaykum. Maktab balansidagi dehqonchilik ekinlari ekish uchun mo‘jallangan yerni ikki tomonlama ya'ni maktab hamda ijarachi shartnomasi asosida foydalanish uchun bir yil muddatga ijaraga bersa bo‘ladimi? Bizni maktabda xuddi shunday shartnoma tuzilgan edi. Hozirda maktabga mulk qo‘mitasi vakillari tekshiruvga kelib mazkur holatni noqonuniy deyapti. Shu masalaga oydinlik kiritishga yordam bersangiz
YURIST JAVOBI:
Birinchi galda aytish kerakki, Fuqarolik kodeksining 107-moddasiga asosan yozma shaklda tuzilgan bitimni, agar ish muomalasi odatlaridan boshqacha tartib kelib chiqmasa, taraflar yoki ularning vakillari imzolashi kerak.
✅ Demak, sizdagi holatda 3 tomonlama ijara shartnomasi shartnoma taraflari tomonidan imzolanishi kerak.
Bunda Vazirlar Mahkamasining 2023-yil 14-dekabrdagi 660-son qaroriga 1-ilovada tasdiqlangan Davlat mulkini ijaraga berish tartibi to‘g‘risidagi Nizom 40-bandiga ko‘ra ijaraga beruvchi bilan ijaraga oluvchi o‘rtasida qonunchilik hujjatlarida belgilangan tartibda o‘tkazilgan onlayn-auksion natijasi bo‘yicha rasmiylashtirilgan bayonnoma asosida tuzilgan ijara shartnomasi elektron shaklda (shu jumladan, elektron raqamli imzo bilan) ikki tomonlama rasmiylashtiriladi.
Ushbu nizom 51-bandida balansda saqlovchining ijaraga berilgan davlat mulkini ijaraga oluvchiga ijaraga beruvchi ishtirokida shartnoma imzolangandan so‘ng ko‘pi bilan besh ish kuni ichida rasmiylashtirib topshirilishini va hech qanday tarzda to‘sqinliksiz undan foydalanishini ta’minlash majburiyati mustahkamlangan.
Aynan shu qoidaga ko‘ra balansda saqlovchi ijara shartnomasini imzolashi shart. Agar u ijara obektini yuqoridagi muddatda topshirmasa, ijaraga oluvchiga yetkazilgan zararni qoplaydi (Nizom 52-band).
Shuningdek, nizomning 45-bandiga muvofiq balansda saqlovchining ijara shartnomasining amal qilish muddati davrida ijaraga oluvchiga ijara obektidan foydalanishiga va unda faoliyat ko‘rsatishiga to‘sqinlik qilishi taqiqlanadi.
❗️Yuqoridagi qoidalarga muvofiq maktab o‘zi mustaqil ijara shartnomasini tuza olmaydi. Sababi u mulkdor emas, balansda saqlovchi hisoblanadi.