Maktabdan moddiy yordam olishni adliya tasdiqladi, lekin buxgalter rad etmoqda. Buxgalterga qanday chora ko‘rish mumkin?
@Yurist_Xizmati 4615-savol:
Assalomu alaykum! Hozirda dekret ta'tilidaman, turmush o‘rtog‘im og‘ir kasallikka (insult) chalinib qoldilar. Maktabdan Moddiy yordam olish uchun ariza yozdim, Adliya tasdiqladi, lekin buhgalter oylik to‘lanadigan bazada bu xodimning familiyasi yo‘q deb rad etibdi, bu vaziyatda qonunchilikda qanday yo‘l tutiladi?
YURIST JAVOBI:
❌ Buxgalterning gaplari asossiz.
✅ Xodimlarga moddiy yordam maktablarda direktor jamg‘armasidan beriladi.
Moddiy yordam olish uchun xodim shu tashkilotda mehnat shartnomasi asosida ishlashi va moddiy yordam olish uchun asos bo‘ladigan holatlar sodir bo‘lishining o‘zi yetarli.
♂️ Shunga ko‘ra moddiy yordam olish uchun ariza maktab rahbariga ariza yozish kerak.
Bunda Vazirlar Mahkamasining 02.08.2022 yildagi 425-son qarori bilan Vazirlar Mahkamasining 30.09.2019 yildagi 823-son qarori 33-bandiga o‘zgartirish kirilgan.
Unga ko‘ra umumta’lim muassasalari xodimlariga moddiy yordam kalendar yil davomida ikki lavozim maoshi (o‘qituvchining tarif stavkasi) miqdorigacha:
• xodimning o‘zi va yaqin qarindoshi (otasi, onasi, turmush o‘rtog‘i, farzandi) vafot etganda;
• yoki og‘ir kasallikka chalinganda;
• xodim tabiiy ofatdan zarar ko‘rganda ko‘rsatiladi.
Qoidaning mazmuniga ko‘ra xodim maktabda mehnat shartnomasi asosida ishlayotgan davrda yuqoridagi holatlar sodir bo‘lsa, direktor jamg‘armasida mablag‘ yetarli bo‘lgan taqdirda xodim 2 lavozim maoshi miqdorida moddiy yordam olishga haqli.
✅ Mana shu qoidaga ko‘ra xodim 1 kalendar yilida jami 2 lavozim maoshigacha moddiy yordam olishi mumkin.
Bunda xodimga moddiy yordam berish bo‘yicha ishchi guruh qarori asosida direktor buyruq chiqaradi.
Og‘ir kasallik – o‘lim xavfi yuqori bo‘lgan va insonning kundalik faoliyatiga yoki hayot sifatiga salbiy ta’sir ko‘rsatadigan yoki ularga g‘amxo‘rlik qiluvchilarga haddan tashqari qiyinchilik kelib chiqaradigan, ba’zan nogironlikka olib keluvchi sog‘liq holati hisoblanadi.
❗️Bu masalada siz buxgalterning harakatlari ustidan tuman adliya bo‘limiga shikoyat qilishingiz lozim.