Oliy ta’lim muassasalarining Psixologlariga 42 kunga yana qo‘shimcha ta’tillar berilishi mumkinmi?
JAVOB
Vazirlar Mahkamasining 263-sonli qaroriga asosan Psixologlarning yillik mehnat ta’tili 42 kundan iborat ekani belgilangan. Masalan Psixolog ta’lim muassasasida 20 yildan buyon ishlab kelmoqda unga 8 kun qo‘shimcha ta’til qo‘shib berish mumkin. Chunki mehnat kodeksining 220-moddasiga asosan Hodimga u bitta tashkilotda yoki tarmoqda ishlagan har besh yil uchun davomiyligi ikki kalendar kun bo‘lgan, biroq jami sakkiz kalendar kundan ko‘p bo‘lmagan har yilgi qo‘shimcha mehnat ta’tili beriladi.
Bundan tashqari MKsining 401-moddasida belgilangan qo‘shimcha ta’tillarni ham bersa bo‘ladi. MK 401-moddasida O‘n ikki yoshga to‘lmagan ikki va undan ortiq bolaning yoki o‘n olti yoshga to‘lmagan nogironligi bo‘lgan bolaning ota-onasidan biriga (ota-ona o‘rnini bosuvchi shaxsga) har yili davomiyligi kamida to‘rt kalendar kun bo‘lgan haq to‘lanadigan qo‘shimcha ta’til beriladi.
Ya’ni agar Psixolog yuqorida aytganimizdek ta’lim muassasasida 20 yildan buyon ishlayotgan va 12 yoshga to‘lmagan ikki yoki undan ortiq farzandning ona (ota)si bo‘lsa unga VMQ 263 bo‘yicha 42 kuni MK 220-moddasi bo‘yicha 8 kun va MK 401-moddasi bo‘yicha 4 kundan iborat ta’til berish mumkin.
Biroq ta’tilni hisoblashda shuni yoddan chiqarmaslik kerakki, Mehnat kodeksining 222-moddasiga asosan Barcha hollarda qonunchilik bilan belgilangan ta’tillarni jamlashda ularning davomiyligi bir ish yili uchun ellik olti kalendar kundan oshib ketishi mumkin emas.