FARZANDIMNI ONASIDAN OLSAM BO‘LADIMI?
Oila kodeksiga aosan Ota-ona alohida yashaganda bolalarning qayerda yashashi ota-onaning kelishuviga binoan belgilanadi. Bunda voyaga yetmaganning qaysi yashash manzilida ro‘yxatdan o‘tkazilishi emas, balki bola ota-onaning qaysi biri bilan doimiy birga yashashi asosiydir.
Ota-ona o‘rtasida kelishuv bo‘lmasa, nizo sud tomonidan bolalar manfaatlaridan kelib chiqib, ularning fikrini hisobga olgan holda hal etiladi.
✅ O‘zbekiston Respublikasi Oliy sudi Plenumining 1998 yil 11 sentyabrdagi 23-sonli «Bolalar tarbiyasi bilan bog‘liq bo‘lgan nizolarni hal qilishda sudlar tomonidan qonunlarni qo‘llash amaliyoti to‘g‘risida»gi Qarorining 3-bandi tushuntirishlariga ko‘ra, sud boshqa-boshqa turadigan ota-onalar o‘rtasida bo‘lgan ularning qaysi biri bilan qaysi bolasi yashash uchun qolishi to‘g‘risidagi nizolarni hal etishda O‘zbekiston Respublikasi Oila kodeksining 71-moddasida belgilangan ota va onaning huquq va majburiyatlarining tengligiga asoslangan holda voyaga yetmagan bolalarning manfaatlariga va xohishlariga mos keladigan hal qiluv qarori chiqarishi lozim.
Bolani olib berish to‘g‘risidagi ishlarni ko‘rishda sudlar
quyidagilarni e’tiborga olishlari kerak:
– bolaning ota-onadan, aka-uka, opa-singillaridan qaysi biriga bog‘lanib qolganligini;
– ota-onadan qaysi biri bolalariga nisbatan ko‘proq g‘amxo‘rlik va e’tibor ko‘rsatayotganligini;
– bolalarning yoshini va ota-onadan qaysi biriga ko‘ngil qo‘yganligini;
– ota-onaning axloqiy va boshqa shaxsiy fazilatlarini;
– ota-onaning har biri bilan bola o‘rtasidagi munosabatlarni;
– bolani tarbiyalash va uning kamoloti uchun shart-sharoitlar (otaonasining mashg‘ulot turi, ish tartibi, moddiy hamda oilaviy ahvoli va boshqalar).
❗️Ota-onadan birining moddiy-maishiy ahvoli ustunligining o‘zi bolani olib berish uchun asos bo‘la olmaydi.
Sud 10 yoshga to‘lgan bolaning ota-onasining qaysi biri bilan yashash istagi borligini ham e’tiborga olishi mumkin.
Mazkur holatda Siz, bolalarning yashash joyini belgilash to‘g‘risida" da’vo arizasi bilan fuqarolik sudiga murojaat qilishingiz mumkin deb hisoblaymiz.