Yangi direktor ishga olinguncha v.v.b. tayinlanishi shartmi?
@Yurist_Xizmati 4528-savol:
Assalomu alaykum! Men aprel oyida maktab direktorligiga nomzod sifatida menejerlik sertifikatini oldim. O‘zim ishlayotgan maktab direktori pensiyaga chiqib ketdi. O‘rniga nomzodimni qo‘yaman desam yo‘q avval boshqa birov V. V. B qo‘yiladi, vaknsiyaga chiqariladi keyin nozodingizni qo‘yasiz deyishdi.Shu to‘g‘rimi. To‘g‘ri bo‘lsa qaysi nizomga asosan? Javob uchun oldindan raxmat
YURIST JAVOBI:
❌ Bunday tartib mavjud emas.
Ya’ni na Mehnat kodeksida, na mehnat to‘g‘risidagi boshqa normativ hujjatlarda (qaror yoki nizomlarda) direktor bilan tuzilgan m.sh bekor qilinganda uning o‘rniga dastlab vaqtincha vazifasini bajaruvchi tayinlanishi va undan so‘ng boshqa nomzod ishga olinishi belgilanmagan.
❗️Lekin O‘zbekiston Respublikasi Maktabgacha va maktab ta’limi vazirining 2023-yil 16-avgustdagi 245-sonli buyrug‘iga 1-ilovada tasdiqlangan nizomga ko‘ra vakant lavozimlarga tanlov asosida ishga qabul qilish tartibi o‘rnatilgan.
Shunga ko‘ra direktor bilan tuzilgan mehnat shartnomasi bekor qilingach, tanlov asosida yangi direktor ishga qabul qilinadi. Yangi direktor ishga qabul qilingungacha uning lavozimida ishlash uchun v.v.b. tayinlanadi.
Qarang! O‘zbekiston Respublikasi Prezidentining ” 2023-yil 26-maydagi PF–79-son Farmoni hamda ushbu farmon ijrosini ta’minlash uchun qabul qilingan O‘zbekiston Respublikasi Maktabgacha va maktab ta’limi vazirining 2023-yil 29 avgustdagi 270-son buyrug‘i ushbu munosabatni tartibga soladi.
Yuqoridagi buyruqqa 2-ilovada tasdiqlangan Direktor lavozimiga ochiq tanlov o‘tkazish to‘g‘risida Tartib 4-bandiga binoan umumiy o‘rta ta’lim muassasalari direktorlarini lavozimga tayinlash Qoraqalpog‘iston Respublikasi Maktabgacha va maktab ta’limi vazirligi, Toshkent shahar va viloyatlar maktabgacha va maktab ta’limi boshqarmasi tomonidan Direktorlar kengashi tavsiyasi bilan amalga oshiriladi.
Bunda mazkur tartib 8-bandida direktorning malaka talablari belgilangan. Unga ko‘ra maktab direktori lavozimi uchun:
➖ kamida bakalavr darajasidagi oliy ma’lumot;
➖ menejerlik sertifikati;
➖ ta’lim sohasida kamida 5 yillik pedagogik staj;
➖ xorijiy tillarni va axborot kommunikatsiya texnologiyalaridan foydalanishni bilishi (tanlov jarayonida ustuvorlik beradi).
Ushbu tartibning 17-bandiga asosan ntr.avloniy.uz elektron portali orqali ariza yuboriladi. Tanlov dastlabki saralash va suhbat bosqichida tashkil etiladi. Dastlabki saralash bosqichida nomzod yuborgan ma’lumotlar o‘rganiladi. Shundan so‘ng suhbat bosqichi bo‘lib o‘tadi.
Suhbat jarayoni intervyu usulida har bir nomzodga soha bo‘yicha bilim saviyasi, shaxsiy va boshqaruv kompetensiyasi, umumiy dunyoqarashi ta’lim sohasidagi islohotlardan xabardorligi, umumiy o‘rta ta’lim maktablaridagi mavjud muammolarni bartaraf etish malakalarining mosligini aniqlashga qaratilgan savol (topshiriq), tasodifiy tanlash (random) orqali beriladi. Bunda, har bir nomzod bilan suhbat davomiyligi 30 daqiqadan oshmasligi lozim (tartib 20-band).
✅ Xulosa qiladigan bo‘lsak, sizdagi vaziyatda direktor lavozimi uchun yuqoridagi tartib asosida suhbatdan o‘tsangiz direktor lavozimida ishlashingiz mumkin.