Question

Kitob o‘qishga odatlanishga 5 qadam

Kitob o‘qish ajoyib mashg‘ulotligini ko‘plar tan oladi, lekin hamma ham mutolaa qilishni uncha sevmaydi. O‘qish miyangiz uchun mashq xolos. Sport bilan shug‘ullanmagan odam uchun jismoniy tarbiyadan qiyini yo‘q, shunday emasmi? Biroq haqiqiy sport odami uchun eng yaxshi dam olish va vaqtni yaxshi o‘tkazish ham mashq! Xuddi shunday kitob o‘qish ham miyangizni chiniqtiradi, fikrlash qobiliyatinigizni oshirib, sizni yuksaltiradi. Kitob o‘qishga odatlanganlarning aytishicha, tinch joyda qiziqarli asarni o‘qish ijtimoiy tarmoqlarda do‘stlar bilan soatlab suhbatlashish, sport musobaqalari yoki seriallar tomosha qilish bilan bir xilda maroqli va orombaxsh ekan.

Kitob o‘qishga odatlanish uncha qiyin emas, faqat quyidagilarga e’tibor berilsa kifoya:

1. Mutolaa qilish xobbisi bilan bir necha oy yoki bir yilda nimalarga erishmoqchisiz?

O‘qib chiqmoqchi bo‘lgan kitoblaringiz soni va ro‘yxatini xonangizda ko‘zingiz har kuni tushadigan joyga qo‘ying. Ijtimoiy tarmoqlardagi sahifalaringizda qaroringiz haqida yozib qo‘ying. Avataringiz ham bugundan kitobxon ekaningizga ishora etsa, undan-da yaxshi!

  2. Kitoblarning janrlari va ba’zi mashhur yozuvchilar, ularning asarlari bilan qiziqib ko‘ring.

Kitob o‘qishni sevadigan do‘stlar topib, ulardan maslahat so‘rang. O‘zingizga yoqmaydigan mavzularda o‘qishga o‘zingizni majbur qilmang! Masalan, kim uchundir fantastika o‘ta qiziq, oddiy mavzular haqida o‘qish uchun kitob titkilash shartmasdek. Boshqalar esa hayotiy mavzular, pul topish, munosabatlar, psixologiya, yana kimlar shunchaki aforizmlarni o‘qib chiqishni yoqtiradi. Janrlar ichida albatta sizga yoqadigani bor, ishoning!

3. Kichik hajmdagi kitoblardan boshlang.

Mutolaa fitnessdek gap. O‘qishni oz-ozdan ko‘paytirib boring. Qanchalik maqtashmasin, katta kitoblar “yangilar” uchun yaxshi emas.

4. Kitobni o‘qing.

O‘qiyotgan kitobingizni o‘zingiz bilan olib yuring. Darvoqe, smartfon yoki planshetdan kitob o‘qish ham juda yaxshi fikr. Uxlashdan avval ikki-uch bet o‘qib yotishga odatlaning. Ammo tabiiyki bir necha kundan keyin besh betdan kam o‘qish sizga qiyin bo‘la boshlaydi.

5. O‘zingizni rag‘batlantiring.

Har doim kitobni tamomlagach, yoqtirgan shirinligingizni sotib olib, yeng. Uuyingizdagi kichkintoylar yoki do‘stlaringiz bilan aylanishga boring. Keyingi shunaqa ajoyib kun navbatdagi kitobni o‘qib tugatganingizda keladi.

Yoz ayni shunday sog‘lom xobbi boshlash uchun yaxshi palla! Kechki salqin bilan kutubxona-yu kitob do‘konlarini bir aylanib kelishga nima deysiz?

Comments

Manba:xobbi.uz  

---

Juda yaxshi maqola chiqibdi. O'qish - juda qiziqarli mashg'ulot.

Man shu oy (oktabr) ichida uchta asar o'qidim.

1. "Toroziy toshbaqasi" (Temur Po'latov) (Roman)
2. "Shinavanda" (Temur Po'latov) (Qissa)
3. "Fotima va Zuhra" (O'lmas Umarbekov)

O'tgan oy (sentabr) 2 ta asar o'qigandim:

1. "Yolg'izlikning yuz yili" (Gabriel Garsia Markes) (Roman)
2. "Javzo" (Risolat Haydarova) (Roman)

Avgust oyida 3 ta:

1. "O'tkan kunlar" (Abdulla Qodiriy) (Roman)
2. "Mehrobdan chayon" (Abdulla Qodiriy) (Roman)
3. "Shaytanatning jin ko'chalari" (Tohir Malik) (Qissa)
va h.k. ko'p yillardan buyon shu ahvol.

---

Ohoo man buncha kitobni bitasiniham o'qimaganman! to'g'ri maktabda o'qirdik ammo undaxam bir ikta varoq parchalar berilar edi man umuman tushunmasdim. Lekin uyumda ko'p asarlar bor ammo ko'pi Kirilchada va SSr dan qolgan.

---

Man yuqorida nomlarini qayd etgan asarlarni barchasi Kirill alifbosida va ayrimlari SSSR davrida chop qilingan, lekin, bu sifatlar asarni qimmatini umuman tushirmaydi. Aksincha yillar o'tgan sari kitobning qadri oshadi, chunki mani qo'limdagi SSSR davridagi kitobda man umuman ko'rmagan bobom yoki yana boshqa insonlarning qo'li tekkan, man termulgan qog'ozga ular ham termulgan bo'lishlari mumkin... Shunday emasmi...

(maqtanmoqchi emasman, lekin 1995-yil ya'ni besh yoshimda uyda Kirill alifbosini o'rgatishgan, 1996-yil maktabda Lotin alifbosini o'rganganman, o'tgan yildan boshlab uyda arab alifbosi asosidagi eski o'zbek yozuvini o'rganyapman...)

P.S.: Kitobimning eskiligidan or qilmagan bo'lardim... :)

---

Haa fikrizga qo'shilaman.