Tibbiyot xodimlariga staj ustamasi qanday hisoblanadi va yillar davomida to‘lanmagan pullarni qayta undirsa bo‘ladimi?
@Yurist_Xizmati 5611-savol:
Savolim: Dadam 18 yildan beri farg‘ona shaxar tibbiyot birlashmasida Terapevt shifokor bo‘lib ishlab kelmoqdalar. 18 yildan beri uzluksiz ish staji uchun umuman qo‘shimcha to‘lov olmayabdilar shuni qaytarib olsak bo‘ladimi? 3 yil uchun, 5 yil uchun, 10 yil uchun alohida xisob kitob qilib to‘lanadimi agar to‘lov qilinsa
YURIST JAVOBI:
Agar dadangizga uzluksiz ish staji uchun qonunchilikda nazarda tutilgan ustama to‘lanmagan bo‘lsa, uni qayta hisoblatish va undirib olish masalasini ko‘tarish mumkin.
Vazirlar Mahkamasining 2005-yil 21-dekabrdagi 276-son qarori bilan tasdiqlangan “O‘zbekiston Respublikasi davlat muassasalari tibbiyot va farmatsevtika xodimlari mehnatiga haq to‘lash tartibi va shartlari to‘g‘risida”gi Nizomga ko‘ra tibbiyot xodimlariga staj uchun ustamalar to‘lanishi nazarda tutilgan.
Ushbu Nizomning 6-bandida:
“staj uchun ustama miqdorini ko‘paytirish huquqini beradigan stajni tasdiqlaydigan hujjatlar mavjud bo‘lganda — staj to‘lgan kundan boshlab amalga oshiriladi” deb belgilangan.
Bundan tashqari, Nizomning 7-bandiga ko‘ra:
“Mehnat haqi noto‘g‘ri to‘langani aniqlangan taqdirda rahbar amaldagi qonunchilikka muvofiq xatolarni zudlik bilan tuzatish va butun davr uchun kam hisoblangan to‘lovni to‘lash choralarini ko‘rishi shart” deb ko‘rsatilgan.
❗️Shu sababli, agar dadangizga haqiqatan ham staj ustamasi hisoblanmagan bo‘lsa, muassasa uni qayta hisoblab berishi kerak bo‘ladi.
Mazkur Nizomning 24-bandiga ko‘ra, poliklinikalarning hududiy uchastkalari:
• terapevtlari;
• pediatrlari;
• tibbiyot hamshiralari;
• o‘smirlar vrachlari;
• oilaviy poliklinikalarning umumiy amaliyot vrachlari va boshqa ayrim toifadagi xodimlariga ish staji uchun alohida ustamalar belgilanadi.
Bu ustama:
• dastlabki 3 yil uchun — tarif stavkasining 10 foizi;
• keyingi har 2 yil uchun yana 10 foizdan qo‘shib boriladi;
• maksimal miqdor — 40 foizgacha etadi.
❗️Agar dadangiz aynan “uchastka terapevti” sifatida ishlagan bo‘lsa, unga aynan shu imtiyozli tartib qo‘llanishi kerak bo‘ladi.
Agar u kishi 24-banddagi alohida toifaga kirmasa, unda Nizomning 25-bandi qo‘llaniladi. Ushbu bandga ko‘ra vrachlar, o‘rta va kichik tibbiyot xodimlari uchun staj ustamalari quyidagicha belgilanadi:
• 5 yildan 10 yilgacha staj bo‘lsa — 5%;
• 10 yildan 15 yilgacha — 10%;
• 15 yildan 20 yilgacha — 15%;
• 20 yildan ortiq bo‘lsa — 20%.
Shu sababli agar dadangizga staj ustamasi umuman hisoblanmagan bo‘lsa, muassasadan:
• qayta hisob-kitob qilishni;
• kam to‘langan summalarni to‘lashni;
• zarur bo‘lsa kompensatsiya hisoblashni talab qilish mumkin.
Bundan tashqari, Mehnat kodeksining 319-moddasiga ko‘ra ish beruvchi xodimga yetkazilgan moddiy zararni qoplashi shart.
MK 333-moddasiga ko‘ra esa ish haqi va boshqa to‘lovlar kechiktirilgan bo‘lsa, ish beruvchi har bir kechiktirilgan kun uchun Markaziy bank stavkasi asosida pulli kompensatsiya ham to‘lashi kerak bo‘ladi.
Amaliy jihatdan quyidagicha yo‘l tutish maqsadga muvofiq:
• avvalo tibbiyot birlashmasiga yozma murojaat qilish;
• lavozim va staj asosida qayta hisob-kitob talab qilish;
• rad javobi berilsa yoki javobsiz qoldirilsa — mehnat inspeksiyasi yoki sudga murojaat qilish.
✉️ Yuristga savol yuborish
Yurist bilan qo‘ng‘iroq orqali bog‘lanish
Rasmiy kanalimiz:
@Yurist_Xizmati