Ustama uchun hujjatlar qaysi oygacha topshirilishi kerak?
@Yurist_Xizmati 5097-savol:
Assalomu alaykum Yurist xizmati. Meni savolim quyidagicha. 823 bo‘yicha ustamaga arizani qaysi oyda berish kerak? Maktab direktori va zavuch arizani yanvar oyida bermagansizlar maktab bo‘yicha hech kim o‘tmaydi deyapti.
YURIST JAVOBI:
Ustama o‘qituvchining bir o‘quv yilidagi natijalariga qarab belgilanadi. Bunda o‘qituvchining ma’lum muddat mehnatga qabilyatsiz bo‘lishi, dekret ta’tili olishi, malaka oshirishga borishi ustamaga da’vogarlik qilishga ta’sir ko‘rsatmaydi.
Vazirlar Mahkamasining 2019 yil 30 sentyabrdagi 823-son qarori bilan tasdiqlangan “Umumiy o‘rta ta’lim muassasalarining o‘rnak ko‘rsatgan xodimlarini rag‘batlantirishning direktor jamg‘armasini tashkil etish va uning mablag‘laridan foydalanish tartibi to‘g‘risida”nizomning 20-bandiga ko‘ra pedagog xodimlarining bazaviy tarif stavkalariga har oylik ustamalar:
tarbiyaviy jarayonning amalga oshirilish sifati va samaradorligiga;
sinfdan tashqari ishlarga hamda o‘quvchilarni insonparvarlik va mehr-oqibat ruhida tarbiyalashga;
tegishli sinflar va o‘quv fanlari uchun tasdiqlangan umumiy o‘rta ta’limning davlat ta’lim standartlarida nazarda tutilgan bilimlar va ko‘nikmalar to‘liq hajmining o‘quvchilar tomonidan o‘zlashtirib olinishi darajasiga;
o‘quv jarayoniga qo‘shilgan aniq hissa, o‘qitishning yuqori samaradorligi va sifati uchun 40 foizgacha miqdorda belgilanadi.
Nizomning 21 – bandiga ko‘ra umumta’lim muassasalari pedagog xodimlarining bazaviy tarif stavkalariga Jamg‘arma hisobidan har oylik ustamalar yangi o‘quv yili uchun o‘tgan o‘quv yili yakunlari bo‘yicha belgilanadi.
Shuningdek, nizom 28-bandiga ko‘ra umumta’lim muassasalari pedagog, psixolog va kutubxona xodimlarining bazaviy tarif stavkalariga Jamg‘arma hisobidan har oylik ustamalar har yili 1 iyulga qadar belgilanadi va o‘quv yilining yarim yillik yakunlari bo‘yicha qayta ko‘rib chiqilishi mumkin.
Shunga ko‘ra, ustama uchun hujjatlar 1 iyulga qadar topshirilishi kerak.
✉️ Yuristga savol yuborish
Yurist bilan qo‘ng‘iroq orqali bog‘lanish
Barcha turdagi hujjatlarga buyurtma berish
Rasmiy kanalimiz:
@Yurist_Xizmati