Pedagog kasbiy sertifikatlash imtihonida ishtirok etmasa yoki ishtirok etib o‘ta olmasa nima bo‘ladi?
Hukumat qarori (12.02.2024 №87) bilan tasdiqlangan reglamentga ko‘ra kasbiy sertifikatlash jarayoniga talabgor o‘z muddatida jalb etilishi uchun u faoliyat ko‘rsatayotgan davlat umumiy o‘rta ta’lim tashkilotining rahbari mas’ul hisoblanadi.
Nazorat sinovida ishtirok etish uchun ro‘yxatdan o‘tib, nazorat sinovida uzrli sabablarga (vaqtincha mehnatga qobiliyatsizligi, davlat yoki jamoat vazifalarini bajarayotgan, respublika va xalqaro musobaqalarda ishtirok etganligi, vaqtincha xorijiy mamlakatda safarda bo‘lib turganligi, yaqin qarindoshi vafot etgan, vakolatli davlat organi yoki ta’lim tashkilotlari rahbarlarining ma’lumotnomasida ko‘rsatilgan asoslar) ko‘ra ishtirok etmagan talabgor nazorat sinovidan o‘tmagan hisoblanadi hamda nazorat sinovida ishtirok etish uchun qaytadan ro‘yxatdan o‘tishi talab etiladi.
✅ Uzrli sabablarga ko‘ra nazorat sinovida ishtirok etmagan talabgordan navbatdan tashqari nazorat sinovida ishtirok etish uchun takroran to‘lov undirilmaydi.
Nazorat sinovida qayta ishtirok etish uchun talabgor tomonidan BHMning bir baravari miqdorida to‘lov to‘lanadi.
❗️Talabgor belgilangan nazorat sinoviga kechikkan yoki uzrsiz sababga ko‘ra kelmagan hamda nazorat sinovi qoidalarini buzganlik uchun jarayondan chetlatilgan taqdirda, to‘langan to‘lov qaytarilmaydi.
Uzrli sabablarga ko‘ra nazorat sinovida ishtirok eta olmagan hamda birinchi marotaba nazorat sinovida ishtirok etib, undan o‘ta olmagan talabgor uchun navbatdan tashqari nazorat sinovi har yili yangi o‘quv yili boshlangunga qadar tashkil etiladi.
Navbatdan tashqari nazorat sinovida ishtirok etish uchun ro‘yxatdan o‘tish sanasi va nazorat sinovini o‘tkazish muddati Vazirlikning rasmiy veb-sayti orqali e’lon qilinadi.