XARIDORGA ChЕK BЕRISH MAJBURIYMI?
Man apteka sohasida ishliman. Biz hozzir virtual kassa ishalatamiz kassadan chiqqan har bir dori nalogda korinadi. Kecha bizga nalogdan hodimlar kelib sizga 12 may kuni soliq hamkor tomonidan ariza kelib tushgan siz mijozga chekini bermagansiz db protokol tuzib ketibdi. Endi savol biz sotgan har bir mahsulot nalogda korinsa biz klentlarga chek berishga majburmizmi, soliq 3 oydan keyin tekshirishga kelishga haqlimi, keyin shundey sporni vaziyatlarda biz qandey yol tutishimix kerak
❗️JAVOB:
O‘zbekiston Respublikasi Vazirlar Mahkamasining 185-son qarori bilan tasdiqlangan "Dori vositalari va tibbiy buyumlarni chakana realazitsiya qilish to‘g‘risida"gi Nizomning 24-bandiga ko‘ra, dori vositalari va tibbiyot buyumlari bilan birga sotib oluvchiga identifikatsiya ma’lumotlari(nomi, dozasi, qadoqlash miqdori), dori vositalari va tibbiyot buyumlarining nomlari, ularni beruvchi shaxsga oid ma’lumotlar, berish sanasi va narxi ko‘rsatilgan tovar cheki berilishi kerak.
Shuningdek, virtual kassa fiskal modulga bog‘lanish imkoniyatiga ega bo‘lgan, fiskal hujjatlarni hosil qiluvchi va hosil qilingan fiskal hujjatlarni fiskal ma’lumotlar operatoriga real vaqt rejimida uzatishni ta’minlovchi, cheklarni qog‘ozga chop etish yoki ularni elektron shaklda yuborish funksiyasiga ega bo‘lgan dasturiy mahsulot va ularning komplekslari hisoblanadi.
“Aholi bilan pulli hisob-kitoblarni amalga oshirishda onlayn nazorat-kassa mashinalari va virtual kassa tizimini qo‘llash tartibi to‘g‘risida”gi
NIZOMga ko‘ra 2020 yildan boshlab virtual kasalarga o‘tish boshlandi. Sizlar ham dorixonalarda matritsali shtrixli kodni (QR-kod) skanerlash yoki cheklarning fiskal belgisini kiritish orqali soliq organlarining maxsus mobil ilovasida ro‘yxatdan o‘tkazilishi mumkin bo‘lgan cheklar taqdim etishingiz kerak.
Bundan tashqari, O‘zbekiston Respublikasi Prezidentining 2019 yil 6 sentyabrdagi “Savdo va xizmat ko‘rsatish sohasidagi hisob-kitoblar tizimiga zamonaviy axborot texnologiyalarini joriy qilish hamda ushbu sohada jamoatchilik nazoratini kuchaytirish chora-tadbirlari to‘g‘risida”gi PF-5813-sonli Farmonida quyidagilar belgilangan:
- to‘lov terminali orqali qabul qilingan to‘lovlar uchun xaridorlarga terminal cheki bilan birga onlayn nazorat-kassa mashinalari yoki virtual kassa cheki ham berilishi shart;
-xarid chekida tovarlar (ishlar, xizmatlar) nomi, miqdori, qiymati (narxi), summasi, qo‘shilgan qiymat solig‘i stavkasi, shuningdek QR kod va fiskal belgi majburiy tartibda aks ettiriladi. Ushbu ma’lumotlar aks ettirilmagan cheklar haqiqiy hisoblanmaydi.
Yuqoridagilardan kelib chiqadiki, o‘zi soliqqa borishidan tashqari, har bitta sotib oluvchiga QR kodli chek berishingiz kerak. Bo‘lmasa Soliq kodeksining 221-moddasi tartibida javobgarlikka tortilishingiz mumkin.