MIB: avtomashina yoki ko‘chmas mulkingizda taqiq bor yoki yo‘qligini tekshirish tizimi ishga tushdi
Qonunchiligimizga ko‘ra, sud yoki boshqa organlar qarorlari bo‘yicha majburiyatlarni bajarmaganda, qarzdorliklar bartaraf etilmagan taqdirda, qarzdorlar jismoniy yoxud yuridik shaxslarga tegishli bo‘lgan avtotransport vositasiga qidiruv e’lon qilinishi yoxud avtotransport
va ko‘chmas mulklarga taqiqlar qo‘yilishi mumkin.
Ko‘p hollarda, fuqarolarimiz, yuridik shaxslar va boshqa subyektlar o‘rtasida avtotransport hamda ko‘chmas mol-mulklarni notarial ravishda rasmiylashtirishda yuzaga keladigan muammolarning biri ham, aynan taqiqlar bilan bog‘liqdir.
Bugungi kunda Byuro organlari tomonidan hujjatlar ijrosi bo‘yicha va qarzdorlik sababli, 378 mingdan ortiq avtotransport vositalariga taqiq qo‘llanilib, 259 mingtasiga qidiruv e’lon qilingan.
Shuningdek, 621 mingta hujjatlar bo‘yicha ko‘chmas mulklarga taqiq o‘rnatilgan.
Demak, fuqarolarimiz o‘rnatilgan taqiqlar masalasiga e’tiborli bo‘lishlari lozim !
Ushbu vaziyatda, avvalo fuqarolarimiz avtotransport vositasi yoki ko‘chmas mulklarga oid qidiruv yoki taqiqqa oid ma’lumotlarni Byuroning www.mib.uz rasmiy saytidagi “Interaktiv xizmatlar” sahifasidagi “Avtotransportni tekshirish” hamda “Ko‘chmas mulkni tekshirish” ruknlari orqali bilish mumkin.
Buning uchun Siz, “Avtotransportni tekshirish” rukniga kirib, avtotransport vositasiga tegishli davlat raqami belgilarini kiritishingiz yoki bo‘lmasa “Ko‘chmas mulkni tekshirish” rukniga kirib kadastr raqamlarni kiritish orqali taqiq yoxud qidiruv mavjud yoki yo‘qligi haqidagi ma’lumotlarga ega bo‘lasiz.
Agarda, avtotransport vositasi yoxud ko‘chmas mulkda taqiqlar aniqlansa, ushbu saytning “Qarzdorlikni tekshirish” rukni orqali bu haqida batafsil ma’lumotni olish mumkin.
Shuningdek, qarzdorlik elektron to‘lov tizimi orqali bartaraf etilganida, mavjud qidiruv va taqiqlar shu zahoti bekor qilinadi.