O‘qituvchilarni bolalarni ro‘yxatga olishga jalb qilish mumkinmi?
@Yurist_Xizmati 4581-savol:
Assalomu aleykum. Men maktabda rus tili ukituvchisi bulib ishlayman. Maktab ukituvchilariga ilmiy mudir tomondan "XUDUDIY BULAK" deb nomlangan daftari berilib uyma uy yurib axoli, maktabga keladigan bolalar malumoti yozib chikish topshirigi berilgan. SAVOLIM: ukituvchi majburmi uyma uy yurib axoli, maktabga keladigan bolalar xakida malumot yigishga??? Bizga maktabda bu ish xar bir ukituvchini vazifasi deyilgan. Shu kanchalik konunan tugri?
YURIST JAVOBI:
♂️ Bu majburiy mehnat emas.
❌ Pedagogning maqomi to‘g‘risidagi qonun 5-moddasiga muvofiq pedagogni kasbiy faoliyati bilan bog‘liq bo‘lmagan ishlarga jalb qilish taqiqlanadi.
☝️E’tibor bergan bo‘lsangiz, qoidada kasbiy faoliyatga bog‘liq bo‘lmagan ishlarga deyilgan. Bunda hududlarni obodonlashtirishga va qishloq xo‘jaligi ishlariga jalb qilish, aholining soliqlar, kommunal to‘lovlar, kreditlar va boshqa qarzdorligi to‘g‘risidagi ma’lumotlarni, bitiruvchilarning bandligi ta’minlanganligi haqidagi hisobotlarni shakllantirishini va taqdim etishini talab qilish va boshqalar pedagogni kasbiy faoliyati bilan bog‘liq bo‘lmagan ishlar toifasiga kiradi.
Endi qarang! Vazirlar Mahkamasining 2017 yil 15 martdagi 140-son qarori bilan tasdiqlangan “Umumta’lim maktabi to‘g‘risida”gi nizomning 39-bandiga ko‘ra maktab yoshidagi bolalarni umumiy o‘rta ta’limga qamrab olish tuman (shahar) hokimliklarining qarori bilan umumta’lim muassasalariga biriktirilgan hududlar (mikrohudud) doirasida umumta’lim muassasasi tomonidan ro‘yxatga olish orqali amalga oshiriladi.
Bunda biriktirilgan hududlar (mikrohudud) doirasida doimiy yashash va vaqtincha turgan joyi bo‘yicha ro‘yxatga olingan va haqiqatda yashovchi oila farzandlari inobatga olinadi.
☝️E’tibor bergan bo‘lsangiz, bolalar umumta’lim muassasasi tomonidan ro‘yxatga olinishi belgilangan.
✅ Shunga ko‘ra bu masalada maktab direktor bu vazifani bajarish uchun maktab xodimlarni jalb qilishga haqli.
Bunda Umumiy o‘rta ta’lim muassasalari (ayrim fanlar chuqur o‘rganiladigan ixtisoslashtirilgan muassasalar) xodimlarining lavozim majburiyatlarini tasdiqlash haqidagi Maktabgacha va maktab ta’limi vazirining 2023-yil 20 - dekabrdagi 565-sonli buyrug‘iga 37-ilova asos bo‘ladi.