Ajrashish bu oson emas. Bir taraf ajrashishni xohlayapti deb sud birdagina ajrashtirib yubormaydi, yoki uning teskarishi bo‘lishi mumkin.
❗️Ajrashish jarayoni juda qiyin hisoblanadi. Oila kodeksi 37-moddasi ikkinchi qismiga muvofiq nikoh er-xotindan biri yoki har ikkalasining arizasiga muvofiq nikohdan ajratish yo‘li bilan, shuningdek sud tomonidan muomalaga layoqatsiz deb topilgan er yoki xotinning vasiysi bergan arizaga muvofiq tugatilishi mumkin.
Endi qarang! Oila kodeksi 40-moddasi hamda Oliy sudi Plenumining 2011 yil 20 iyuldagi 06-sonli «Sudlar tomonidan nikohdan ajratishga oid ishlar bo‘yicha qonunchilikni qo‘llash amaliyoti to‘g‘risida»gi qaroriga muvofiq er-xotinga yarashish uchun olti oygacha muhlat tayinlashga haqli.
Bunda shuni e’tiborga olish lozimki, Oila kodeksining 218-moddasi talablarini inobatga olgan holda yarashish uchun beriladigan muhlat uch oydan kam bo‘lishi samarasiz hisoblanadi.
❗️Shunga ko‘ra sizlardagi vaziyatda 6 oy tugagandan so‘ng sud ishni ko‘rib chiqishi lozim.
Oila kodeksi 41-moddasi hamda Oliy sudi Plenumining 2011 yil 20 iyuldagi 06-sonli qarorining 16-bandlariga tayangan holda nikohdan ajratish to‘g‘risidagi talab, faqat, er-xotin bundan buyon birga hayot kechirishlarining va oila batamom buzilganligi sababli uni saqlab qolishning iloji yo‘qligi aniqlangan holdagina qanoatlantirilishi lozim.
Shunday ekan, agar sud oilaning keyinchalik birga yashab ketish imkoni yo‘q deb topsagina, nikohni bekor qilishi mumkin.
Agar o‘rtangizdagi nikoh bekor bo‘lsa, unda sizga bir qator huquqlarga ega bo‘lasiz.
1⃣ Farzandingizning moddiy ta’minoti uchun aliment undirish. Aliment bolaning haqqi! Shu tufayli ota-ona ularni moddiy jihatdan ta’minlamasa, davlat qonuniy yo‘l bilan ulardan voyaga yetmagan farzandlari uchun aliment undiradi.
Oila kodeksining 96-moddasida har bir ota-ona o‘zining voyaga yetmagan farzandi uchun aliment to‘lashi shart ekanligi belgilangan.
☝️Mana shu qoidalarga ko‘ra ota aliment to‘lashdan bosh torta olmaydi. Bolaning manfaatlari uchun ota-onadan aliment undirishda ularning ish joyiga egaligi ahamiyatga ega emas.
Bunda Oila kodeksining 99-moddasiga binoan aliment to‘lovi agarda ota ona o‘rtasida alohida kelishuv mavjud bo‘lmasa sud tomonidan bolalar soniga qarab belgilanadi:
ota-onaning har oydagi ish haqi va (yoki) boshqa daromadining:
➖ bir bola uchun — to‘rtdan bir qismi miqdorida undiriladi.
2⃣ O‘zingizning moddiy ta’minotingiz uchun ham aliment olishingiz mumkin. Mazkur kodeks 117-moddasida er-xotin bir-biriga moddiy yordam berishi shartligi qayd etilgan. Bunda Yetarli mablag‘ga ega bo‘lgan sobiq er (xotin)dan:
sobiq xotin homiladorlik davrida va o‘rtada bola tug‘ilgan kundan boshlab uch yil davomida sud tartibida aliment talab qilish huquqiga egadir.
3⃣ Oila kodeksi 23-moddasiga muvofiq er va xotinning nikoh davomida orttirgan mol-mulklari, shuningdek nikoh qayd etilgunga qadar, bo‘lajak er-xotinning umumiy mablag‘lari hisobiga olingan mol-mulklari, agar qonun yoki nikoh shartnomasida boshqacha hol ko‘rsatilmagan bo‘lsa, ularning birgalikdagi umumiy mulki hisoblanadi. Ushbu qoidaga ko‘ra siz turmush qurganingizdan keyin orttirilgan har qanday mulk sizlarning umumiy mulk hisoblanadi.
Oila kodeksining 24-moddasiga ko‘ra er va xotin ularning birgalikdagi umumiy mulki bo‘lgan mol-mulkka egalik qilish, undan foydalanish va uni tasarruf etishda teng huquqlarga egadir.