Olimlar o‘lim xavfini 40 foizga oshiradigan xato haqida ma’lumot berishdi
Garvard tibbiyot maktabi olimlari barqaror sog‘lom uyqu jadvali erta o‘lim xavfini 40 foizga kamaytirishi mumkinligini aniqladilar.
Olimlar maxsus dastur orqali 1750 ishtirokchini o‘rtacha 7 yil davomida kuzatib borgan. Ularga uyqu rejimi, kundalik yorug‘lik ta’siri va jismoniy faollikni baholaydigan asboblar taqib qo‘yilgan.
Yakunda 1010 ishtirokchida uyqu vaqti optimal, 740 nafarida uyqu vaqti tanqis bo‘lgan (yetti soatdan kam uyqu), deya tasniflangan. Kuzatuv davrida 176 kishi vafot etgan. Muntazam ravishda yetarlicha uxlaganlarda erta o‘lim ehtimoli 40 foizga past bo‘lgan.
Tavsiyalar shuni ko‘rsatadiki, odam har tunda yetti soatdan to‘qqiz soatgacha uxlashi kerak. Olti yoshdan 12 yoshgacha bo‘lgan bolalar kechasi 9-12, o‘smirlar esa 8-10 soat uxlashlari lozim. Ko‘p tadqiqotlarda uyqusizlik yurak, buyrak va qon tomir kasalliklari, diabet, insult, semizlik hamda depressiyaga sabab bo‘lishi aytilgan.