Chet elda davolanganda bolnichniy qanday ochiladi?
@Yurist_Xizmati 4525-savol:
Assalomu alaykum. Men umumiy ta'lim maktabida o‘qituvchi bo‘lib ishlayman. Shu yilning 10-fevralidan 8-aprelugacha bo‘lgan muddatda Hindiston davlatida sog‘lig‘im kelishmaganligi sababli og‘ir operatsiyani boshimdan o‘tkazdim. Savol; mening chet eldagi muolaja davrimda kasallik varaqasini qaysi tashkilotdan olaman, chet el shifoxonasidan berilgan kasallik varaqalarini ingliz tilida qo‘limda turibdi, men endi kasallik varaqasi uchun to‘lovni qay tartibda olsam bo‘ladi, qaysi qaror asosida olishim mumkinligini tushuntirsangiz?
YURIST JAVOBI:
Mehnatga layoqatsizlik varaqalarini berish tartibi to‘g‘risidagi yo‘riqnomaning (ro‘yxat raqami 2667, 17.04.2015-y.) 25-bandiga binoan chet elda vaqtincha bo‘lgan vaqtda kasallanganlik yoki chet elda davolanganlik to‘g‘risidagi hujjatlarning davlat yoki rus tilidagi notarial tasdiqlangan tarjimasi taqdim qilinganda, mehnatga layoqatsizlikni tasdiqlovchi asoslarni inobatga olib, bemorning yashash yoki ish joyidagi davolash-profilaktika muassasasining vrachlik maslahat komissiyasi tomonidan mehnatga layoqatsizlik varaqasi rasmiylashtiriladi.
☝️Mana shu qoidaga ko‘ra siz dastlab istalgan notarial idoraga borib, ingliz tilidagi tibbiy ma’lumotnomani o‘zbek tiliga tarjima qildirib, uni notarial tasdiqlatishingiz lozim.
Bunda notarius Notariuslar tomonidan notarial harakatlarni amalga oshirish tartibi to‘g‘risidagi yo‘riqnoma (ro‘yxat raqami 3113)ga muvofiq hujjatlarni bir tildan boshqa tilga tarjima qilinganligi faktini tasdiqlash to‘g‘risidagi notarial harakatni amalga oshiradi.
❗️Notarial tasdiqlangan tibbiy ma’lumotnomani olib, uni tuman TTBga murojaat qilishingiz lozim. Tibbiyot birlashmasi mazkur ma’lumotnoma asosida sizga vaqtincha mehnatga layoqatsizlik varaqasi rasmiylashtiradi.