O‘qituvchi ota-onalar nomidan kundalik.com'ga kirishi kerakmi?
@Yurist_Xizmati 4515-savol:
Assalomu aleykum! Men 11-sinflarga sinf rahbarman. Maktabimiz zavuchi o‘quvchilarning emaktab ya'ni kundalik.comda ota-onalar faolligi bo‘yicha siz ma'sulsiz deb bu sizga 205-buyruq bo‘yicha yuklatilgan deb qo‘ymayapti. Ota-onalarni majburiy obuna qilganday qildik. Endi ularning farzandlarining baholarini ko‘rib chiqishiga undashimiz aks holda o‘quvchilarning ota-onasining login, paroli bilan birma-bir kirib chiqing o‘zingiz deyapti?! Bu qanchalik qonunga to‘g‘ri keladi?!
YURIST JAVOBI:
❗️Bu masalada siz zavuchning harakatlari ustidan tuman adliya bo‘limiga yoki mehnat inspektoriga murojaat qilishingiz lozim. Uning bu harakatlari noqonuniydir.
1⃣ Birinchidan, Mehnat kodeksi kodeks 115-moddasiga ko‘ra ish beruvchi xodimdan quyidagilarni talab qilishga haqli emas:
agar ushbu Kodeksda va boshqa qonunda boshqacha qoidalar belgilanmagan bo‘lsa, mehnat shartnomasida shart qilib ko‘rsatilmagan ishni bajarishni;
qonunga xilof bo‘lgan, xodimning yoki boshqa shaxslarning huquqlarini buzadigan, hayoti va sog‘lig‘ini xavf ostiga qo‘yadigan, ularning sha’ni, qadr-qimmati hamda ishchanlik obro‘siga putur yetkazadigan harakatlarni amalga oshirishni.
2⃣ Ikkinchidan, Pedagogning maqomi to‘g‘risidagi qonun 5-moddasiga asosan pedagogni kasbiy faoliyati bilan bog‘liq bo‘lmagan ishlarga jalb etish taqiqlangan.
3⃣ Uchinchidan, Umumiy o‘rta ta’lim muassasalarining pedagogik mutaxassisliklari bo‘yicha namunaviy yillik ish rejasini shakllantirish tartibi to‘g‘risidagi Yo‘riqnoma (ro‘yxat raqami 3058) 15-bandida Umumiy o‘rta ta’lim muassasalari pedagog xodimlari tomonidan sinf jurnali (bosma yoki elektron) yuritilishi belgilangan. Bunda o‘qituvchi o‘z lavozim majburiyatlaridan kelib chiqib, junral yuritadi.
Qarang! Maktabgacha va maktab ta’limi vazirining 2023-yil 20 - dekabrdagi 565-sonli buyrug‘iga 37-ilovada tasdiqlangan Umumiy o‘rta ta’lim muassasalari (ayrim fanlar chuqur o‘rganiladigan ixtisoslashtirilgan muassasalar) xodimlarining lavozim majburiyatlari belgilangan bo‘lib, unda o‘qituvchining elektron jurnalni yuritish majburiyati belgilangan.
❗️Shunga ko‘ra o‘qituvchi darsda davomad va baholarni kundalik platformasiga kiritishi shart. Lekin uning majburiyatlari qatorida ota-onalarning nomida kirish qayd etilmagan.
❌ Shunga ko‘ra bunday talab qo‘yish mutlaqo taqiqlanadi. Bu vaziyatda zavuchning harakati uchun unga ma’muriy javobgarlik chorasi qo‘llanilishi mumkin.