MAKTABDA PSIXOLOG BO‘LIB ISHLAYMAN MЕNGA OYLIGIMNING YARMI TO‘LANMOQDA SHU TO‘G‘RIMI
Men maktab psixologi bulib ishlab kelyapman 1 stavka men mutaxasis bulmaganligim uchun ish stavkasining yarmi tulanadi.Shunda men necha soat ishlashim kerak. Asli psixolog necha soat ishlashi kerak.
JAVOB:
Javob: Vazirlar Mahkamasining 12.07.2019 yildagi 577-son qarori bilan tasdiqlangan "Umumiy o‘rta va o‘rta maxsus davlat ta’lim muassasalarida psixologik xizmat faoliyatini tashkil etish to‘g‘risida NIZOM"ning 8-bandiga ko‘ra, Ta’lim muassasasida psixologik xizmat muassasa rahbarining buyrug‘iga muvofiq o‘quvchilar sonidan kelib chiqib 1 — 3 ta shtat birligidan iborat tarkibda tashkil etiladi.
Psixologik xizmatning psixolog kadrlari soni bir nafardan ortiq bo‘lganda ulardan biriga psixologik xizmat rahbarligi yuklanadi.
9-bandda esa Psixolog kadrlar lavozimiga qo‘yiladigan malaka talablari tegishli ravishda O‘zbekiston Respublikasi Xalq ta’limi vazirligi hamda Oliy va o‘rta maxsus ta’lim vazirligi tomonidan Bandlik va mehnat munosabatlari vazirligi bilan birgalikda belgilanishi keltirilgan.
Malaka talablari:
a) kamida bakalavr darajasidagi psixologik yoki oliy ma’lumot va unga qo‘shimcha psixologiya yo‘nalishi bo‘yicha qayta tayyorlov kursini tugatganlik;
b) xorijiy tillardan birining boshlang‘ich bosqichini va axborot-kommunikatsiya texnologiyalaridan foydalanishni bilishi.
12-bandga ko‘ra, Ta’lim muassasalarida psixolog kadrlar uchun haftasiga 36 soatli ish tartibi joriy etiladi.
Demak, sizga 1-stavka uchun haftasiga 36 soatli ish tartibi joriy etilgan. Malaka talabingiz yuqoridagidek, kamida bakalavr darajadagi psixologik ma’lumot, yoki boshqa oliy ma’lumot bo‘lsa ham maxsus tayyorlov kursida o‘qishingiz belgilangan.
Lekin, sizga mutaxasissligingiz emas degan asos bilan ish haqini to‘liqsiz to‘lash mumkin emas. Chunki, mehnat qonunchiligiga ko‘ra, ish haqi bajarilgan ishga yoki soatiga qarab, shuningdek, malaka qiyinchiligiga ko‘ra to‘lanadi.