Sinf rahbarlarga har kuni o‘quvchilarning telefonini yig‘ish majburiyatini yuklash to‘g‘rimi?
@Yurist_Xizmati 4939-savol:
Salom. Men o‘rta maktabda tarix o‘qituvchisi bo‘lib ishlayman. Men ham 11-sinf sinf rahbariman. Yaqinda biz har kuni ertalab sinfimizdagi o‘quvchilardan telefon yig‘ish majburiyatini olgan hujjatga imzo chekishga majbur bo‘ldik. Savolim: Sinf rahbari har kuni o‘ziga tayinlangan sinfdan telefon yig‘ishi shartmi? Ushbu jarayonni qanday hujjatlar tartibga soladi?
YURIST JAVOBI:
Maktabgacha va maktab ta’limi vazirining 27.06.2023 yildagi 190-sonli buyrug‘i bilan tasdiqlangan umumiy o‘rta ta’lim muassasasi sinf rahbarining yo‘riqnomasiga ko‘ra Sinf rahbarining majburiyatlari belgilangan.
❌ Biroq ular qatorida o‘quvchilarning telefonlarini yig‘ib olish degan majburiyat mavjud emas.
Bu masalada Vazirlar Mahkamasining 2012-yil 21 maydagi 139-son qaroriga ilovada tasdiqlangan O‘zbekiston Respublikasi ta’lim muassasalarida mobil telefonlardan foydalanish tartibi to‘g‘risidagi Nizom 7-bandida maxsus qoida belgilangan.
Unga ko‘ra Ta’lim muassasalarida o‘tkaziladigan o‘quv mashg‘ulotlari va tadbirlar (saflanish, tarbiyaviy soatlar, bayram, sport tadbirlari va shu kabilar) boshlanishidan oldin ta’lim oluvchilar:
✅ telefonini o‘chirib qo‘yishi;
✅ telefonini portfeli, sumkasi va shu kabilarga solib qo‘yishi shart.
❗️Shunday ekan, sizdagi holatda o‘quvchilarning telefonlarini yig‘ishtirib olish shart emas.