Nogiron bolam bor. Faqat unga g‘amxo‘rlik qilaman. Pensiya yoshigacha hech kayerda ishlay olmasam menga pensiya tayinlanadimi?
“Fuqarolarning davlat pensiya ta’minoti to‘g‘risida”gi Qonunga muvofiq, 18 yoshgacha nogironligi bo‘lgan bolaga qarab turish davri pensiyaga chiqishda ish stajiga qo‘shib hisoblanadi.
Bunda, qarab turish vaqti pensiya tayinlash uchun zarur bo‘lgan ish stajiga faqat qarab turgan va qarab turishga muhtoj bo‘lgan shaxs bilan birga yashagan shaxslardan biriga qo‘shib hisoblanadi.
Ushbu qarab turish vaqti fuqaroda umumiy ish staji kamida 7 yil bo‘lgan taqdirda ish stajiga qo‘shib hisoblanadi.
❗️Agar fuqaroda kamida 7 yil ish staji bo‘lmagan taqdirda 18 yoshgacha bolaga qarab turish davri ish stajiga hisoblanmaydi.
Bunday vaziyatda fuqaroni ijtimoiy himoya qilish, moddiy qo‘llab-quvvatlash maqsadida unga “yoshga doir nafaqa” tayinlanadi.
Ma’lumot uchun, yoshga doir nafaqaga
◼️ erkaklar 65 yoshdan;
◼️ ayollar 60 yoshdan chiqish huquqiga ega bo‘lsa;
◼️ bolalikdan nogironligi bo‘lgan farzandi bor (bo‘lgan) onalar 55 yoshdan chiqishlari mumkin.