Дадаси
Гоҳ титратар зардангиз,
Гоҳ сўзингиз пардасиз,
Ёмон қарияпсиз~ми,
Болаларим дадаси?!.
Сал нарсага ёнасиз,
Айтган гапдан тонасиз,
Қай ишимдан қонасиз,
Болаларим дадаси?!.
Умр ўтмоқда қаранг,
Бўлманг асаби таранг,
Эҳ,чидаяпман, аранг,
Болаларим дадаси?!.
Ҳозирдан қариб олманг,
Ҳали ишлар кўп, толманг,
Гапирсам қовоқ солманг,
Болаларим дадаси?!.
Фарзандларимиз қўллаб,
Яхшиликларга йўллаб,
Юринг тоғ бўлиб, тиргаб,
Болаларим дадаси?!.
Бирга тўйлар қилайлик,
Набиралар кўрайлик,
Насиб қилсин, суяйлик,
Болаларим дадаси?!.
Майли, нима бўлса ҳам,
Юринг соғ-омон, бардам,
Доим қўлласин, Эгам,
Болаларим дадаси?!.
Қалбларин қўри бўлинг,
Уйларин нури бўлинг,
Боболар зўри бўлинг,
Ин Шаа Аллоҳ, дадаси!!!