Ona – mustahkam arqon
Otalar ish yuzasidan yoki boshqa sabablar bilan oila davrasida kam bo'ladi. Shunday vaqtda ota va bolalar orasini bog'lovchi ko'prik, mustahkam arqon vazifasini ona bajarishi kerak.
Ona bolalariga "Adajoning seni yaxshi ko'radi, hozirgina gaplashganimizda sen haqingda so'radi", "Adajoningning ishlari ko'p, kelganlarida birga sayrga chiqamiz, o'ynaymiz" kabi gaplar bilan bolaga otani yaxshi ko'rsatib, unga mehrini uyg'otib tursa, orada uzoqlashish bo'lmaydi.
Ba'zi onalar buning mutlaqo teskarisini qiladi: "Adangni biz bilan ishi yo'q! Unga ulfatlari, ko'cha bo'lsa, bo'ldi!" kabi gaplar bilan bolada otaga nisbatan salbiy fikr uyg'otadi. Bu noto'g'ri, albatta.
Otasi yomon bo'lgan taqdirda ham bolani otaga mehribon, hurmatli, itoatli qilib tarbiyalang. Otaning yuziga oyoq qo'yishni o'rgangan bola onasiga ham shunday qilmasligiga kim kafolat beradi?