Ota farzandini sudsiz olib ketoladimi?
@Yurist_Xizmati 5683-savol:
Assalamu aleykum! Turmush ortogim bilan oilaviy kelishmovchiliklar tufayli yashamayapmiz birga. Man ajrimga ariza berdim lekin sud arizamni rad qilib yubordi 6 oy srok berdi. Xozirgi kunda erim man bilan yarashishga rosa xarakat qilvotti kechirim soravotti lekin man yashash niyatim yoq gap sozlardan charchadim uji ajrashaman disam bolani olib ketaman, sani onalikdan oldirib tashliman advokat bilan gaplashdim dibanga bosim otkazvotti. Qizim 5 yoshda uni otasi mandan tortib ololidimi yoki yoqmi. Man tugallanmagan oliy malumotli oqituvchiman iqtisodiy fanlardan dars beraman qizim bogchaga boradi erimni asosiy ish joyi yoq qatta ish bolsa shotta ishlab yururadila malumotlari maktab bitirganlar xolos. Qizimni obketib qolishi qanchalik togri iltimos javobizni kutaman man bu savolga qancha tez bolsa shuncha tez javob olmoqchoman sababi erim xar kuni manga bosim otkazib yoki yashisan yoki qizimni obketaman dib yotibdi
YURIST JAVOBI:
Hurmatli fuqaro, yozgan holatingizdan anglashilishicha, sud nikohni bekor qilish to‘g‘risidagi arizangizni darhol qanoatlantirmasdan, yarashish uchun 6 oylik muhlat bergan.
Avvalo shuni bilishingiz kerakki, ota bolani o‘zboshimchalik bilan onadan tortib olib ketishga haqli emas. Bola qaysi ota-ona bilan yashashi masalasi faqat ota-onaning o‘zaro kelishuvi yoki sud qarori bilan hal qilinadi.
Oila kodeksining 75-moddasiga ko‘ra, ota-ona alohida yashaganda bolaning qayerda yashashi avvalo ularning kelishuvi bilan belgilanadi. Agar kelishuvga erishilmasa, nizo sud tomonidan bolaning eng ustun manfaatlaridan kelib chiqib hal qilinadi.
Bunda sud:
· bolaning yoshini;
· ota-onaning shaxsiy va axloqiy fazilatlarini;
· bolaning qaysi ota-onaga ko‘proq bog‘langanligini;
· har bir ota-onaning bolani tarbiyalash va voyaga yetkazish uchun yaratishi mumkin bo‘lgan sharoitlarini (ish joyi, daromadi, yashash sharoiti va boshqa holatlarni) har tomonlama baholaydi.
Sizning holatingizda qizingiz 5 yoshda, bog‘chaga qatnaydi va hozir siz bilan yashamoqda. Turmush o‘rtog‘ingizning doimiy ish joyi yo‘qligi, siz esa o‘qituvchi bo‘lib ishlayotganingiz ham sud tomonidan baholanadigan holatlardan biridir. Biroq, faqat shu omillarning o‘zi bilan emas, eng avvalo bolaning manfaatlari mezon qilib olinadi.
Shuningdek, Oila kodeksining 76-moddasiga ko‘ra, ota-onadan biri boladan alohida yashasa, u bola bilan ko‘rishish va uning tarbiyasida ishtirok etish huquqiga ega. Agar ota-ona bu masalada kelisha olmasa, sud vasiylik va homiylik organi ishtirokida bolaning otasi bilan ko‘rishish tartibini belgilaydi. Sud qarori bo‘lmaguncha ota bolani o‘zboshimchalik bilan olib ketishga haqli emas.
Bu masala bo‘yicha Oliy sud Plenumining 1998-yil 11-sentyabrdagi 23-son qarorining 7-bandida ham sudlar bola kim bilan yashashi va ota-onaning bola bilan ko‘rishish tartibini belgilashda bolaning yoshi, ruhiy va jismoniy holati, ota-onaga bog‘liqligi, vasiylik va homiylik organining xulosasi hamda boshqa barcha dalillarni birgalikda baholashi lozimligi tushuntirilgan. Zarur hollarda hatto sud-psixologik ekspertizasi ham tayinlanishi mumkin.
Sizni turmush o‘rtog‘ingizning "bolani olib ketaman" yoki "onalik huquqidan mahrum qilaman" degan gaplari o‘z-o‘zidan hech qanday huquqiy kuchga ega emas. U faqat sud qarori bilan bolaning yashash joyini o‘zgartirishni so‘rashi mumkin. Sud esa bunday masalani faqat bolaning eng ustun manfaatlaridan kelib chiqib hal qiladi.
❗️Agar turmush o‘rtog‘ingiz sizga doimiy bosim o‘tkazayotgan, qo‘rqitayotgan yoki bolani majburan olib ketishga urinayotgan bo‘lsa, bu holat yuzasidan ichki ishlar organlariga yoki xotin-qizlarni himoya qilish bo‘yicha mas’ul organlarga murojaat qilishingiz mumkin. Agar zarurat bo‘lsa, siz suddan himoya orderi berish masalasini ham ko‘tarishingiz mumkin.
✉️ Yuristga savol yuborish
Yurist bilan qo‘ng‘iroq orqali bog‘lanish
Barcha turdagi hujjatlarga buyurtma berish
Rasmiy kanalimiz:
@Yurist_Xizmati