Farroshlarga ish haqi to‘g‘ri to‘lanyaptimi?
@Yurist_Xizmati 5658-savol:
Maktabimizda 3ta farrosh 0,75 stavkada ishlab kelmokda,lekin makabimiz ukitish jarayoni 2smenadan iborat farroshlarga ishxaki tugri tulab beriliyaptimi.Javobingiz un oldindan raxmat,asosli javob bulsa juda yaxshi.
YURIST JAVOBI:
Bu savolga faqat maktabingiz 2 smenada ishlayotganiga qarab javob berish mumkin emas.
Mehnat kodeksining 182 va 185-moddalariga ko‘ra, 1 stavka uchun ish vaqti me’yori haftasiga 40 soatdan oshmasligi kerak. 0,75 stavkada ishlayotgan xodim esa shu me’yorning 75 foizi miqdorida ishlashi va shunga yarasha haq olishi lozim.
Shuning uchun maktabda 3 nafar farroshning har biri 0,75 stavkada rasmiylashtirilgan bo‘lsa va ular amalda ham 0,75 stavka me’yori doirasida ishlayotgan bo‘lsa, ish haqi to‘g‘ri to‘lanyapti deb hisoblanadi.
Lekin agar ular:
· ertalabki va kechki smenalar tugaguncha deyarli butun kun ishlayotgan bo‘lsa;
· 0,75 stavka uchun belgilangan ish vaqtidan ortiq ishlayotgan bo‘lsa unda ish beruvchi qo‘shimcha ish vaqti uchun haq to‘lashi kerak. Mehnat kodeksining 262-moddasiga ko‘ra, ish vaqtidan tashqari ish uchun kamida 1,5 yoki 2 hissa miqdorida haq to‘lanadi.
Agar maktabda haqiqatdan ham kun bo‘yi ikki smenali ish tashkil etilgan bo‘lsa, masalani hal qilishning to‘g‘ri yo‘li Mehnat kodeksining 192-moddasiga muvofiq smenali ish rejimi joriy etish va smenalar jadvalini tasdiqlash hisoblanadi.
Demak, asosiy masala maktabning 2 smenada ishlashi emas, balki farroshlarning amalda necha soat ishlayotganidir. Agar ular 0,75 stavka me’yoridan ortiq ishlayotgan bo‘lsa, qo‘shimcha haq to‘lash yoki shtat birliklarini qayta ko‘rib chiqish masalasi yuzaga keladi.
✉️ Yuristga savol yuborish
Yurist bilan qo‘ng‘iroq orqali bog‘lanish
Barcha turdagi hujjatlarga buyurtma berish
Rasmiy kanalimiz:
@Yurist_Xizmati