Yo‘l bo‘yida ayron sotish mumkinmi?
@Yurist_Xizmati 5590-savol:
Assalomu alaykum. Mahallamiz hududidan oziq-ovqat va nooziq-ovqat tovarlarini sotish uchun YATT ochib magazin ochgan edik. Magazinning yonida ayron va go‘jaosh sotishimiz uchun qanday hujjat to‘g‘irlashimiz kerak?
YURIST JAVOBI:
Siz YATT sifatida magazin ochgansiz va endi qo‘shimcha ravishda ayron va go‘jaosh sotmoqchisiz. Bu holatda faqat savdo emas, balki oziq-ovqat mahsulotini tayyorlash (ishlab chiqarish) faoliyati ham yuzaga keladi.
“Oziq-ovqat mahsulotining sifati va xavfsizligi to‘g‘risida”gi Qonunga ko‘ra, oziq-ovqat mahsulotlari belgilangan sanitariya, gigiyena va texnik normalarga muvofiq tayyorlanishi shart. Ya’ni siz mahsulotni shunchaki tayyorlab sotishingiz mumkin emas, bu faoliyat uchun alohida talablar bor.
Shuningdek, ushbu Qonunning 6-moddasiga asosan, oziq-ovqat mahsuloti va uni tayyorlashda ishlatiladigan jihozlar davlat ro‘yxatidan o‘tgan va xavfsizligi tasdiqlangan bo‘lishi kerak. Qonunning 14-moddasiga ko‘ra esa, mahsulotni sotish uchun uning sifati va xavfsizligini tasdiqlovchi hujjatlar (sertifikat yoki muvofiqlik belgisi) bo‘lishi shart.
Demak:
– siz faoliyat turini kengaytirib, oziq-ovqat tayyorlash (umumiy ovqatlanish) yo‘nalishini ham qo‘shishingiz kerak;
– faoliyatingizni hududiy sanitariya-epidemiologiya xizmati (SES) bilan kelishishingiz va xulosa (sanitariya ruxsati) olishingiz lozim;
– tayyorlash jarayoni, jihozlar, idishlar va sharoitlar sanitariya talablariga javob berishi kerak;
– zarur hollarda mahsulot yoki xom ashyo bo‘yicha muvofiqlik (sertifikat) talab etilishi mumkin.
Vazirlar Mahkamasining 2021 yil 30 yanvardagi 43-son qaroriga muvofiq, oziq-ovqat bilan bog‘liq ayrim mahsulotlar va jihozlar majburiy tarzda muvofiqlik bahosidan o‘tkaziladi.
Shuning uchun, ayron va go‘jaosh sotishni qonuniy yo‘lga qo‘yish uchun:
1. SESdan sanitariya xulosasi olish;
2. jihoz va sharoitlarni talabga moslash;
3. zarur hollarda sertifikatlash masalasini hal qilish kerak bo‘ladi.
✅ Xulosa qilib aytganda, siz bu faoliyat bilan shug‘ullanishingiz mumkin, lekin albatta sanitariya-epidemiologiya xizmati ruxsati va oziq-ovqat xavfsizligiga doir talablarga rioya qilish shart.
✉️ Yuristga savol yuborish
Yurist bilan qo‘ng‘iroq orqali bog‘lanish
Barcha turdagi hujjatlarga buyurtma berish
Rasmiy kanalimiz:
@Yurist_Xizmati