Haydovchilarni mastlikka ya’ni 01ga yozish tartibi qanday?
@Yurist_Xizmati 5129-savol:
➡️ Savolni o‘qish
YURIST JAVOBI:
O‘zbekiston Respublikasi Sog‘liqni saqlash vazirligi, O‘zbekiston Respublikasi Ichki ishlar vazirligi, O‘zbekiston Respublikasi Oliy sudi, O‘zbekiston Respublikasi Bosh prokuraturasining 2018-yil 14-dekabrda ro‘yxatdan o‘tgan qaroriga asosan (ro‘yxat raqami 3099) “Transport vositalari haydovchilarining mast holatda ekanligini aniqlash tartibi to‘g‘risidagi” Nizom tasdiqlangan.
Ushbu Nizomning 7-bandiga muvofiq, Tekshiruv kamida ikki nafar xolis ishtirokida amalga oshiriladi, DYHXX xodimi tomonidan kuzatuv kamerasi (body camera)dan foydalangan holda amalga oshiriladigan tekshiruvlar bundan mustasno.
♂️ Tekshiruv jarayonida DYHXX xodimi transport vositasi haydovchisi va boshqa fuqarolar bilan muloqotda xushmuomala, ularga nisbatan xatti-harakatlari tushunarli va qonunchilik talablari asosida bo‘lishi, shuningdek sanitariya-gigiyena qoidalariga qat’iy rioya etishi lozim. Tekshiruv o‘tkazishda DYHXX xodimi transport vositasi haydovchisi tomonidan chiqarilgan havo namunasini texnik vositani qo‘llash yo‘riqnomasiga asosan oladi.
☝️E’tibor bering! Agar Transport vositasi haydovchisi tomonidan chiqarilgan havodagi etanol bug‘lari konsentratsiyasi ko‘rsatkichi 0,135 milligramm va undan yuqori bo‘lgan hollarda DYHXX xodimi haydovchiga nisbatan alkogolli ichimlik iste’mol qilganligi fakti yuzasidan O‘zbekiston Respublikasi Ma’muriy javobgarlik to‘g‘risidagi kodeksining 131-moddasiga muvofiq ma’muriy bayonnoma rasmiylashtiradi.
Shuningdek, Transport vositasi haydovchisi texnik vosita yordamida tekshiruvdan o‘tishdan bosh tortgan yoxud unda texnik vosita orqali tekshiruv natijalariga e’tiroz mavjud bo‘lgan hollarda DYHXX xodimi transport vositasini boshqarayotgan shaxsning mast holatda ekanligini aniqlash maqsadida tibbiy tekshiruvdan o‘tkazish uchun tuman va shahar davolash-profilaktika muassasalariga olib boradi. Bunda Transport vositasi haydovchisi tekshiruvdan o‘tishdan bo‘yin tovlagan taqdirda DYHXX xodimi unga nisbatan O‘zbekiston Respublikasi Ma’muriy javobgarlik to‘g‘risidagi kodeksining 136-moddasiga muvofiq ma’muriy bayonnoma rasmiylashtiradi.
Yuqoridagi Nizomning 17-bandi bo‘yicha Tibbiy tekshiruv transport vositasi haydovchisi to‘xtatilgan (yo‘l-transport hodisasi ro‘y bergan) paytdan boshlab, uzog‘i bilan bir soat ichida o‘tkazilishi lozim.
Transport vositasi haydovchisining mast holatda ekanligini aniqlash, narkologik dispanserlarda narkologlar tomonidan yoki sog‘liqni saqlash idoralari belgilagan tuman va shahar davolash-profilaktika muassasalarida maxsus tayyorgarlikdan o‘tgan shifokorlar tomonidan o‘tkaziladi.
Davolash-profilaktika muassasalarida alkogolli mastlik holatida ekanligiga gumon qilingan shaxslar barcha taraflama klinik tekshiruvdan o‘tkaziladilar va etanol bug‘lari bor-yo‘qligini aniqlash maqsadida ulardan faqat chiqarilayotgan nafas havosi namunasi olinadi.
Shaxsning giyohvandlik vositalari ta’siridan yoki o‘zgacha tarzda mast holatda ekanligiga gumon paydo bo‘lganda mastlik holatini keltirib chiqargan moddani aniqlash maqsadida biologik suyuqliklar (peshob, so‘lak) tekshiruvdan o‘tkazilishi shart.
Endi qarang! Shaxsning alkogolli ichimliklar, giyohvandlik vositalari ta’siridan yoki o‘zgacha tarzda mast holatda ekanligi to‘g‘risidagi tibbiy xulosani chiqarish qonning laborator tekshiruvi natijalari asosida amalga oshiriladi.
Shaxsning alkogol mahsulotini iste’mol qilganligi to‘g‘risidagi tibbiy xulosa alkogol mahsulotining qondagi konsentratsiyasi 0,3 promille va undan ortiq bo‘lgan hollarda chiqariladi.
❗️Xulosa qilib aytiladigan bo‘lsa, sizda ushbu tartibda na’munalar olinmagan bo‘lsa chiqariladigan qaror ustidan sudga murojaat qilishingiz kerak. Shu bilan birgalikda mastlik holati alkogolni qachon iste’mol qilganga emas balki uning miqdoriga bog‘liq bo‘ladi.
✉️ Yuristga savol yuborish
Yurist bilan qo‘ng‘iroq orqali bo‘lg‘anish
Rasmiy kanalimiz
@Yurist_Xizmati