Attestatsiya bo‘yicha apellyatsiya bergandim, jarayonda qatnashsam bo‘ladimi?
@Yurist_Xizmati 5095-savol:
Assalomu aleykum. Men shu yil bahorda o‘tkazilayotgan atestatsiyada navbatdan tashqari ishtirok etdim. Atestatsiya jarayonida internet tarmog‘ida 2 marta uzulishlar bo‘lib JSHSHR raqamni qayta kiritsamda kompyuter qotib qoldi va uchunchi martasida nazoratchi meni boshqa kompyuterga o‘tkazishdi. Uzulishlar vaqtlari qayta testga kirish uchun JSHSHR raqamlarini terib test jarayoniga qaytgunimcha 10 daqiqalar atrofida vaqtdan yutqazdim. Shu bilan birga kompyuter ishlamaganiga asabiylashib fikrlash ham diqqat e’tiborim ham yo‘qoldi. Binodagi nazoratchilardan so‘rasam bu holatni texnik nosozlik deb aytishdi. (Belgilangan to‘lovni amalga oshirganman sifatli internet tarmog‘i hamda soz kompyuter bilan taminlab berilishi kerak deb bilaman) Bu jarayonni binodagi kuzatuv kamerasi ham tasdiqlaydi. Apelatsiya berildi. Ushbu holatda atestatsiyada qayta ishtirok etish uchun Menga ruxsat beriladimi?
YURIST JAVOBI:
Pedagog kadrlarning attestatsiya natijalaridan norozi bo‘lib, apellyasiya tartibida murojaat qilishlari qonuniy huquq hisoblanadi.
Ushbu jarayonning tartib-taomillari O‘zbekiston Respublikasi Vazirlar Mahkamasining 2021-yil 17-sentyabrdagi 572-son qarori bilan tasdiqlangan “Maktabgacha, umumiy o‘rta, o‘rta maxsus, professional va maktabdan tashqari ta’lim tashkilotlari pedagog kadrlarini attestatsiyadan o‘tkazish tartibi to‘g‘risida”gi Nizomda belgilab berilgan.
Mazkur Nizomning 58-bandida ko‘rsatilishicha, apellyatsiya komissiyasi pedagog kadrning murojaatini ko‘rib chiqayotgan vaqtda u ushbu jarayonda bevosita ishtirok etishi yoki masofaviy, ya’ni onlayn tarzda qatnashishi mumkin.
Bundan tashqari, Nizomning 53-bandiga binoan, apellyatsiya komissiyalarining onlayn yig‘ilishlari va ularning o‘tkazilish vaqtlari haqida ma’lumotlar tegishli vakolatli vazirliklarning rasmiy veb-saytlarida e’lon qilinadi. Bu esa pedagog kadrlarning o‘z huquqlarini amalga oshirish imkoniyatini kengaytiradi va jarayonning shaffofligini oshiradi.
✅ Shunday ekan, ushbu komissiya yig‘ilishida shaxsan yoki onlayn tarzda qatnashish huquqiga egasiz — bu sizning qonuniy imkoniyatingizdir.