PЕNSIYAMDAN QIRQIB TASHLADI..
⚡️SAVOL:
Men bundan ikki yil oldin pensiyaga chiqqanman. Pensiyam 800 ming so‘mdan oshiqroq. Yaqinda Pensiya jamg‘armasi hodimlari meni chaqirib Sizga ortiqcha pensiya to‘lab yuborilgan, endi pensiyangizdan qirqamiz deb qo‘limga bitta qaror berdi. Ular shunga haqlimi, o‘zi qanday holatda pensiyadan qirqish mumkin ?
⚡️JAVOB:
"Fuqarolarning davlat pensiya ta’minoti to‘g‘risida"gi Qonunning 65-moddasiga ko‘ra, pensiyalardan chegirmalar:
➖ sudning hal qiluv qarorlari, ajrimlari, qarorlari va hukmlari (mulkiy undirishlar borasida), notarial idoralarning ijro varaqalari hamda O‘zbekiston Respublikasining qonunchiligiga muvofiq ijrosi sud hal qiluv qarorlarini ijro etish uchun belgilangan tartibda amalga oshiriladigan boshqa hal qiluv qarorlari va qarorlar asosida;
➖ O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi tuman (shahar) bo‘limining qaroriga binoan — pensionerga uning tomonidan qilingan suiiste’molliklar oqibatida (qasddan noto‘g‘ri hujjatlarni taqdim etish, boquvchisini yo‘qotganlik pensiyasi tayinlangan oila a’zolari tarkibidagi o‘zgarishlar haqida ma’lumotlar taqdim etmaslik natijasida) yoxud hisoblashdagi yoki boshqa texnik xato oqibatida pensiya miqdoridan ortiqcha pullar to‘langan taqdirda qilinishi mumkin deb ko‘rsatilgan.
✏️ Yuqorida ko‘rsatilgan asos va sabablar bilan pensiya oluvchilarning pensiyalaridan har oyda 50 foizgacha miqdorda chegirib qolinishi mumkin. Siz Sizni qo‘lingizga qarorni bergan hodimdan qarorni izohlab berishini xam talab qiling! Qachon ortiqcha to‘langan, qancha ortiqcha to‘langan, rostdan xam ortiqcha to‘langanmi o‘zi degan masalalarga oydinlik kiritib berishi kerak u. Agar o‘sha qarordan shubhangiz yoki qarorga e’tirozingiz bo‘lsa prokuratura organlariga yoki bevosita sudga murojaat qiling!