Kredit to‘lovlari qancha vaqtda qaytarilmaganda Bank fuqaroni sudga beradi?
Bizga murojaat qilinuvchi fuqaro ayni shu savol mazmuniga yaqin savol bilan murojaat qilgan. Unga ko‘ra, bugungi kunda bank uning garovga qo‘yilgan mol-mulkini kredit to‘lovlariga qaratish va foiz to‘lovlarini undirish yuzasidan sudga murojaat qilgan.
Bunday masalalarga javob berishda avvalo biz bank va fuqaro o‘rtasida tuziladigan shartnomalarni o‘rganib chiqishimiz lozim bo‘ladi. Sababi hech bir normativ hujjatda fuqaroning qancha muddatda qarzni to‘lash majburiyatini bajarmaganligi bankning sudga murojaat qilishiga asos bo‘lishi bilan bog‘liq holatlar keltirilmaydi.
Shu sababli shartnoma muhim! shartnoma bilan tanishib chiqilganda shartnomaning 2.6-bandida qarz oluvchi kredit asosiy qarzi yoki foiz to‘lovlarining muntazam kechiktirib to‘lanishi, krediti qaytarish jadvali asosida to‘lovning uch yoki undan ortiq marotaba buzilishi holarida, shuningdek, kreditni maqsadga nomuvofiq ishlatganda, uning moliyaviy ahvoli yomonlashganda berilgan kreditning muddatidan oldin hisoblangan foizlari bilan qaytarishni bank talab qilish huquqiga ega ekanligi belgilangan.
Ko‘rganingizdek agar qarzdor kredit qaytarish jadvali asosida to‘lovning uch yoki undan ortiq marotaba buzgan holda bankda sudga murojaat qilish huquqi paydo bo‘lgan.
Bunday qoida aksariyat kredit shartnomalarida bir hil bo‘lib, ketma-ket uch maradan ortiq yoki uch yoki undan ortiq marotaba buzish shaklida keltiriladi. Shu sababli kredit to‘lovlari bilan bog‘liq munosabatlarda albatta shartnoma qoidalariga e’tibor berish kerak.