BARCHA MAHALLA RAISLARI MAY OYIDA YANA QAYTA SAYLOVDAN O‘TADIMI?
@Yurist_Xizmati 5029-savol:
Assalomu alaykum! 1.Men 2023 yil 29 iyul kuni bo‘shab qolgan o‘ringa saylov orqali o‘tganman. Shunda faoliyatimni 3 yil to‘lguncha yani 2026 yil 29 iyulgacha davom ettiramanmi, may oyida bo‘ladigan saylovni aloqasi yo‘qmi bizni mahallada. 2. Mahalla raisligi saylovida amaldagi raisni nomzodini qo‘ymaslikka nimalar asos bo‘ladi Viloyat hokimini ro‘yxatiga tushgan deb nomzodini chiqarish mumkinmi. Bu paytda nima qilishim kerak qayerga murojaat qilsam bòladi. Iltimos batafsil va aniqroq javob bering
YURIST JAVOBI:
✍️ “Fuqarolar yig‘ini raisi saylovi to‘g‘risida”gi qonunning 17-moddasiga binoan, Fuqarolar yig‘ini raisi lavozimiga nomzodlar O‘zbekiston Respublikasi fuqarolari bo‘lishi, qoida tariqasida, oliy ma’lumotga ega bo‘lishi, bevosita saylovga qadar kamida besh yil tegishli hududda doimiy yashayotgan bo‘lishi, tashkilotchilik qobiliyatiga, davlat organlarida yoki nodavlat notijorat tashkilotlarida yoxud tadbirkorlik va boshqa xo‘jalik faoliyati sohasida ish tajribasiga, shuningdek hayotiy tajribaga va aholi o‘rtasida obro‘-e’tiborga ega bo‘lishi kerak.
Sud tomonidan muomalaga layoqatsiz deb topilgan, og‘ir yoxud o‘ta og‘ir jinoyatlarni sodir etganlik uchun sudlanganlik holati tugallanmagan yoki sudlanganligi olib tashlanmagan shaxslar, shuningdek sudning hukmi bilan ozodlikdan mahrum etish joylarida saqlanayotgan, haqiqiy harbiy xizmatdagi shaxslar, diniy tashkilotlarning professional xizmatchilari fuqarolar yig‘ini raisi lavozimiga saylanish uchun nomzod etib ko‘rsatilishi mumkin emas.
✅ Ushbu qonunning 16-moddasiga muvofiq esa, Fuqarolar yig‘ini raisi lavozimiga nomzodlar ko‘rsatish tegishli hududda doimiy yashovchi fuqarolarning fikri inobatga olingan holda ishchi guruh tomonidan amalga oshiriladi. Ishchi guruh fuqarolar yig‘ini raisi lavozimiga nomzodlarga doir hujjatlarni tayyorlaydi va tuman yoki shahar hokimi bilan kelishish uchun tegishli komissiyaga saylovdan kamida o‘n kun oldin taqdim etadi.
Hujjatlarga fuqarolar yig‘ini raisi lavozimiga nomzodlarning o‘z nomzodi ko‘rsatilishiga yozma roziligi ilova qilinadi.
Tuman yoki shahar hokimi fuqarolar yig‘ini raisi lavozimiga taqdim etilgan nomzodlarning hujjatlarini ko‘rib chiqadi va o‘zining ushbu nomzodlar bo‘yicha asoslantirilgan xulosalarini keyinchalik ishchi guruhlarga topshirish uchun tegishli komissiyalarga yuboradi. Ishchi guruh tuman yoki shahar hokimining xulosasini olganidan keyin fuqarolar yig‘ini raisi lavozimiga kelishilgan nomzodlar haqidagi axborotni saylovdan kamida besh kun oldin fuqarolar yig‘ini binosiga va guzarlarga osib qo‘yadi.
♂️ Endi qarang! Fuqarolar yig‘ini raisi vakolatlari muddatidan ilgari tugatilgan taqdirda, tegishli fuqarolar yig‘inlarida ushbu Qonunning talablariga rioya etilgan holda yangi saylov o‘tkaziladi.
⭐️Qonunning 28-moddasi ikkinchi qismi bo‘yicha bo‘shab qolgan o‘rinlarga fuqarolar yig‘inlari raislari besh yil muddatga saylanadi. Ushbu norma 2025 yil 11 fevraldagi O‘RQ-1027-sonli qonun bilan yangilandi va shu paytga qadar mazkur muddat uch yilni tashkil qilib kelgan.
❗️Bunday holatda sizga qaysi qoida qo‘llanilishi ahamiyatli. Bunda qonun ortga qaytish kuchiga ega emas, shuningdek, mazkur qabul qilingan qonunning 5-moddasiga asosan, Ushbu Qonun amalga kiritilguniga qadar saylangan fuqarolar yig‘inlari raislari o‘z vakolatlarini ular saylangan uch yillik muddat tugaguniga qadar amalga oshirishi to‘g‘ridan to‘g‘ri ko‘rsatilgan. Ya’ni, besh yillik muddat bundan keying saylanadiganlarga taalluqli.
‼️Yuqoridagilardan xulosalash mumkinki, siz raislikka uch yil muddatga saylangan bo‘lsangiz muddat tugagunicha yangitdan saylov o‘tkazilmaydi(raisning vakolatlarini muddatidan ilgari tugatish asoslari mavjud bo‘lgan holatlar bundan mustasno).