Pensioner xodim bilan mehnat shartnomasini qanday bekor qilsa bo‘ladi?
@Yurist_Xizmati 4600-savol:
Muassasada ishlayatgan pensioner xodimlar bilan qanday qilib mexnat shartnomasini bekor qilsa bo‘ladi?
YURIST JAVOBI:
❗️Nafaqaga chiqqan shaxs ishlamasligi kerak degan qoida yo‘q. Aksincha O‘zbekiston Respublikasi Prezidentining 167-son farmoniga ko‘ra pensiya yoshiga yetganlarni ishdan bo‘shatish taqiqlanishi haqidagi qoidalar keltirilgan.
Undan tashqari, yangi tahrirdagi Mehnat kodeksiga muvofiq (161-modda) ish beruvchi xodimning pensiya yoshiga yetganligi munosabati bilan u bilan tuzilgan mehnat shartnomasini bekor qilish huquqiga ega emas.
❗️Lekin siz pensiya yoshiga yetgan xodimni boshqa asos bilan ishdan bo‘shatishingiz mumkin.
Qarang! Mehnat kodeksining 161-moddasi ikkinchi qismi 3-bandiga ko‘ra ish beruvchi xodimning malakasi yetarli bo‘lmaganligi sababli egallab turgan lavozimiga yoki bajarayotgan ishiga muvofiq emasligi sababli o‘z tashabbusi bilan mehnat shartnomasini bekor qilishga haqli.
Oliy sudi plenumining 20.11.2023 yildagi 26-son qarori 29-bandiga asosan agar xodim u bilan tuzilgan mehnat shartnomasiga ko‘ra, aynan bajarishi shart bo‘lgan ishni uddalay olmayotgan bo‘lsagina, noloyiqligi bo‘yicha u bilan mehnat shartnomasini bekor qilinishiga yo‘l qo‘yiladi.
Bunda xodimning noloyiqligi bajarishi shart bo‘lgan, topshirilgan ishni uddalay olmayotganligini isbotlovchi aniq faktlar (tekshiruv dalolatnomalari, bevosita rahbarlik qiluvchisining, nazorat qiluvchining bildirish xatlari, hisobotlar, attestatsiya hujjatlari va ishning past sifatligini, yaroqsiz mahsulot chiqarayotgani, ish hajmini hamda ishlab chiqarish normasini bajara olmayotganini va hokazolarni tasdiqlovchi boshqa hujjatlar) bilan tasdiqlanishi lozim.
☝️Yuqoridagi qoidalarga ko‘ra siz ham xodimning ishlab turgan lavozimiga mos yoki yo‘qligini, uning lavozim majburiyatlarini qay darajada bajarayoganligini aniqlash uchun buyruq asosida xizmat tekshiruvi o‘tkazishingiz mumkin. Mazkur jarayonda MK 302 – 311-moddalari qoidalariga rioya qilinishi lozim.
✅ Agar tekshiruv natijasida xodimning haqiqatda egallab turgan lavozimiga mos emasligi aniqlansa, yuqoridagi asos bilan xodimni ishdan bo‘shatish mumkin.