TO‘LOV PULI QAYTARILADI (MI)?
Fuqarodan kelgan murojaat:
Vrachlar kategoriya olish u.n dakument topshiramiz dakument topshirish pullik 675ming sum dakument topshirdik to‘lovini qildik lekin dakument rad etilgan ekan meni xabarim yuq oradan 25 kun o‘tdi boshqatdan dakument topshiraman desam yana 675ming to‘lov qilasiz deyishyabdi oldingi to‘lov qayerga ketadi shuni bilmoqchi edim.
JAVOB:
O‘zbekiston Respublikasi Vazirlar Mahkamasining 18.09.2023 yildagi 477-son qarori bilan tasdiqlangan Tibbiyot va farmatsevtika xodimlarini attestatsiyadan o‘tkazish va ularga malaka toifalari berish bo‘yicha davlat xizmatlarini ko‘rsatishning Ma’muriy Reglamentiga asosan talabgor davlat xizmatlaridan foydalanishda ularni ko‘rsatishning har qanday bosqichida bosh tortish huquqiga ega. Talabgor davlat xizmatlaridan foydalanishdan bosh tortganda, uning so‘rovnomasi ko‘rib chiqilmasdan qoldiriladi va to‘langan to‘lov summasi qaytarilmaydi.
Talabgorga davlat xizmatlari ko‘rsatilishi rad etilgan taqdirda, vakolatli organ tomonidan ushbu Reglamentga muvofiq rad etish to‘g‘risidagi bildirishnoma rad etish sabablari va talabgor ushbu sabablarni bartaraf etib, takroran ko‘rib chiqish uchun hujjatlarni taqdim etishi mumkin bo‘lgan muddat (20 ish kun ichida) ko‘rsatilgan holda, Davlat xizmatlari markaziga yoki YAIDXP orqali uning shaxsiy kabinetiga elektron shaklda yuboriladi.
Talabgorga rad etish sabablari bartaraf etilishi uchun taqdim etilgan muddat davomida qayta taqdim etilgan hujjatlar ko‘rib chiqilganligi uchun to‘lov undirilmaydi.
Rad etish to‘g‘risidagi bildirishnomada ko‘rsatilgan muddat tugagandan so‘ng berilgan so‘rovnoma yangidan berilgan hisoblanadi.
Ya’ni, agar siz arizangiz rad etilganidan so‘ng 20 kun ichida kamchiliklarni to‘g‘rilab, qayta ariza topshirgan taqdiringizda yana to‘lov qilmasdingiz. Lekin yuqorida ko‘rsatilgan muddat tugaganidan so‘ng berilgan so‘rovnoma yangidan berilgan hisoblanadi. Ya’ni, to‘lov qilishingiz lozim bo‘ladi bu uchun.
telegram kanal - yurist maslahati