Xizmat safari davridagi dam olish kunlari nima bo‘ladi?
❓Biz budjet tashkilotimiz. Bir xodimimiz 15 kunlik xizmat safari bo‘lgan. Bu vaqtda shanba-yakshanba kunlari ham xizmat safari ichida bo‘lgan. Bu kunlarga ikki xissa haq to‘lashimiz, yoki bir xissa to‘lab, qolganiga otgul berishimiz kerakmi?
Agar shanba-yakshanba kunlari ham xizmat safari ichiga kirib ketgan bo‘lsa va bu kunlari xizmat safari joyidagi ishxona dam olgan bo‘lsa, demak safardagi xodim ham dam olgan bo‘ladi va o‘z-o‘zidan bu kunlarga unga ish haqi to‘lanmaydi.
Chunki, 424-sonli qaror bilan tasdiqlangan “O‘zbekiston Respublikasi hududida xizmat safarlari to‘g‘risida”gi nizomning 11-bandiga asosan “xizmat safarida bo‘lgan xodimga u yuborilgan tashkilotdagi ish vaqti rejimi va dam olish vaqtlari taalluqli bo‘ladi” deyilgan.
11-bandda yana bir qoida bor: “agar xodim xizmat safari davomida dam olish yoki bayram kunlarida xizmat safariga yuborilgan joyda ishlagan bo‘lsa, ushbu kunlarda ishlagani uchun amaldagi qonunchilik hujjatlariga muvofiq kompensatsiya to‘lanadi”.
Bunga ko‘ra, xizmat safariga yuborilgan joyda shanba-yakshanba kunlari dam olish kunlari ish kuni sifatida belgilansa va bu kunlari safarga borgan xodim ham ishlagan bo‘lsa, unga ushbu dam olish kunlaridagi mehnati uchun MK 263-moddasiga asosan haq to‘lanadi.
Ya’ni, bunda xodimga ikki xissa miqdorida haq to‘lanadi, yoki xodimning istagiga ko‘ra bir xissa miqdorida haq to‘lab, qo‘shimchasiga boshqa kun dam beriladi. Faqat buning uchun xodim ish beruvchi tomonidan dam olish kuni ishga jalb qilingan bo‘lishi va bu kunlari amalda ishlagan bo‘lishi kerak.
Umumiy qoidaga binoan, oraliqdagi shanba-yakshanba kunlari xizmat safari tarkibiga kirganligi uchun, baribir bu davr uchun xodimga turar-joy, sutkalik harajatlar va ish beruvchi ruhsat bergan boshqa harajatlar qoplanadi. Dam olish kuni qaytgan bo‘lsa, yo‘l-kira harajatlari ham albatta to‘lab beriladi.