Buyruqdagi sanani xato kiritgani uchun kadrga intizomiy jazo qo‘llash mumkinmi?
@Yurist_Xizmati 4494-savol:
Assalomu alaykum men sentyabrdan buyon maktabda kadrlar bo‘yicha menejer bo‘lib ishlayman.Bir xodimga xomiladorlik tug‘ruq ta'tiliga ketish haqida buyruq chiqargan edim. Ayrim texnik sabablarga ko‘ra buyruqqa xodimning ta'tilga chiqish kuni xato ketib qolibdi lekin buyruqni qolgan qismlari to‘g‘ri. Yuridik markaz xodimlari shuni muvofiqlashtirib qaytadan yuborsangiz bo‘ladi Qaytsadan yuborsam Yuridik Markaz xodimi buyruq chiqargan xodimga nisbatan intizomiy jazo qo‘llash buyruq chiqaring debdi Shu to‘g‘rimi?
YURIST JAVOBI:
❗️Intizomiy ta’sir chorasi xodim haqiqatda o‘z mehnat majburiyatlarini bajarmaganda qo‘llaniladi.
Mehnat kodeksining 313-moddasi uchinchi qismida intizomiy jazo chorasini qo‘llashda sodir etilgan qilmishning og‘ir-yengilligi, uning sodir etilishi holatlari, xodimning avvalgi ishi va xulq-atvori hisobga olinishi belgilangan.
Maktabgacha va maktab ta’limi vazirining 2023-yil 20 - dekabrdagi 565-sonli buyrug‘iga 37-ilovada tasdiqlangan Umumiy o‘rta ta’lim muassasalari (ayrim fanlar chuqur o‘rganiladigan ixtisoslashtirilgan muassasalar) xodimlarining lavozim majburiyatlariga asosan Kadrlar bo‘yicha inspektor (menejer)ning asosiy majburiyati mehnatga oid qonun hujjatlariga muvofiq xodimlarning shaxsiy tarkibi bo‘yicha buyruqlarni (ishga qabul qilish, boshqa ishga o‘tkazish, mehnat shartnomasini bekor qilish, mehnat ta’tili berish va h.k.) rasmiylashtirish va ularning belgilangan tartibda saqlanishini ta’minlash etib belgilangan.
✅ Shunga ko‘ra sizga bu majburiyatni to‘g‘ri bajarmaganingiz uchun intizomiy ta’sir chorasi qo‘llash mumkin.
Bunda Mehnat kodeksining 312-moddasiga muvofiq mehnat intizomini buzganligi uchun ish beruvchi xodimga quyidagi intizomiy jazo choralarini qo‘llashga haqli:
1) hayfsan;
2) o‘rtacha oylik ish haqining o‘ttiz foizidan ko‘p bo‘lmagan miqdorda jarima. Ichki mehnat tartibi qoidalarida xodimga o‘rtacha oylik ish haqining ellik foizidan ko‘p bo‘lmagan miqdorda jarima solinishi hollari nazarda tutilishi mumkin.
3) mehnat shartnomasini bekor qilish.
Ushbu qoidaning mazmuniga ko‘ra xodim mehnat intizomini buzganda unga yuqoridagi ta’sir choralaridan biri qo‘llaniladi. Bunda xodim sodir etgan qilmish uchun faqat bitta intizomiy ta’sir chorasi qo‘llashi mumkin.
Xodimga intizomiy ta’sir chorasi qo‘llash tartibi MK 313-moddasida belgilgan. Ushbu normaga muvofiq ish beruvchi xodimdan intizomiy jazo chorasi qo‘llanilguniga qadar yozma tushuntirishni talab qilishi, shu jumladan, agar intizomiy qilmish xizmat tekshiruvi natijalariga ko‘ra aniqlangan bo‘lsa, talab qilishi shart.
Xodimning yozma tushuntirish taqdim etishni rad etganligi intizomiy jazo chorasi qo‘llanilishi uchun monelik qilmaydi va hozir bo‘lgan guvohlar ko‘rsatilgan holda dalolatnoma bilan rasmiylashtiriladi. Shunga ko‘ra sizdagi holatda tushuntirish xati yozishdan bosh tortish holati bo‘lganda ish beruvchi dalolatnoma tuzgan holda intizomiy ta’sir chorasini qo‘llashi mumkin.
Shuni ham aytish kerakki, intizomiy jazo chorasini qo‘llashda sodir etilgan qilmishning og‘ir-yengilligi, uning sodir etilishi holatlari, xodimning avvalgi ishi va xulq-atvori hisobga olinadi.
♂️ Shu qoidaga ko‘ra ish beruvchi sizdagi vaziyatni mazkur mezonlar asosida baholashi, shundan so‘nggina intizomiy ta’sir chorasi qo‘llashi yoki qo‘llamasligi mumkin.